2022 წლის თებერვლიდან რუსულმა შეიარაღებულმა ძალებმა დაახლოებით 1.2 მილიონი ადამიანი დაკარგა (მოკლული, დაჭრილი და დაკარგული). ამის შესახებ ინფორმაციას სტრატეგიული და საერთაშორისო კვლევების ცენტრი (CSIS) ავრცეელებს. მათი ცნობით, მოკლულია 275 000–325 000 ადამიანი, რაც მეორე მსოფლიო ომის შემდეგ ნებისმიერ დიდი სახელმწიფოსთვის უპრეცედენტო მაჩვენებელია.

CSIS წერს, რომ არსებული ტემპის შენარჩუნების შემთხვევაში, რუსეთისა და უკრაინის ჯამურმა დანაკარგებმა 2026 წლის გაზაფხულისთვის შესაძლოა 2 მილიონს მიაღწიოს.

CSIS-ის ინფორმაციით, მიუხედავად იმისა, რომ რუსეთმა 2024 წლის დასაწყისიდან ოპერატიული ინიციატივა მოიპოვა, მისი წინსვლა უკიდურესად ნელია. ძირითადი შეტევების დროს რუსული ძალები საშუალოდ დღეში მხოლოდ 15–70 მეტრით გადაადგილდებიან — ტემპი, რომელიც გასული საუკუნის ყველაზე სისხლიან სამხედრო კამპანიებსაც კი ჩამოუვარდება, მათ შორის, პირველი მსოფლიო ომის სომის ბრძოლას. 2024 წლის დასაწყისიდან რუსეთმა უკრაინის ტერიტორიის 1.5 პროცენტზე ნაკლები დაიკავა.

ტერიტორიულად, რუსეთის წარმატებები შეზღუდულია. 2024 წელს მან 3604 კვ.კმ დაიკავა, ხოლო 2025 წელს — 4831 კვ.კმ, რაც ჯამში უკრაინის ტერიტორიის 1.5 პროცენტზე ნაკლებს შეადგენს. მთლიანობაში, რუსეთი უკრაინის დაახლოებით 20 პროცენტს, მათ შორის ყირიმსა და დონბასის ნაწილებს აკონტროლებს, რაც მკვეთრად ჩამოუვარდება მისი მთავარი მიზნის — უკრაინის დამორჩილების — მიღწევას.

მიუხედავად იმისა, რომ რუსეთი ბირთვულ იარაღს კვლავ ფლობს, მისი სამხედრო, ეკონომიკური და ტექნოლოგიური მაჩვენებლები აღარ შეესაბამება დიდი ძალის სტატუსს. დანაკარგები ისტორიულად უპრეცედენტოა, ტერიტორიული წინსვლა შეზღუდულია, ხოლო ეკონომიკური პერსპექტივა სუსტი. საზოგადოებრივი მხარდაჭერა ომის მიმართ იკლებს, თუმცა პრეზიდენტი პუტინი მაღალი ადამიანური ფასის მიუხედავად მზად არის კონფლიქტი გააგრძელოს.

CSIS წერს, რომ უკრაინაში ომის ფარგლებში რუსეთი უმნიშვნელო სამხედრო წინსვლისთვის უკიდურესად მაღალ ფასს იხდის.