Apple TV-ის ერთ-ერთი ყველაზე წარმატებული სერიალი ბრუნდება: სტრიმინგმა ოფიციალურად დაადასტურა, რომ Ted Lasso-ს მე-4 სეზონის პრემიერა ზაფხულში შედგება. ზუსტი თარიღი ჯერ არ სახელდება, თუმცა ეს განცხადება მნიშვნელოვანია პლატფორმისთვის — სერიალს, რომელიც Apple TV-ის ერთ-ერთ ყველაზე პოპულარულ პროექტად ითვლება, რამდენიმეწლიანი პაუზა ჰქონდა.

კადრი Ted Lasso-ს მეოთხე სეზონიდან

ფოტო: Apple TV

სერიალის მესამე სეზონი 2023 წელს დასრულდა და მაშინ ბევრს ეგონა, რომ ეს ისტორიის დასასრული იყო. თუმცა შარშან Apple-მა დაადასტურა, რომ მე-4 სეზონზე მუშაობა მიმდინარეობდა, ხოლო ივლისში პირველი კადრიც გაავრცელა. ახალი სეზონი ახალ სიუჟეტურ ხაზს დაიწყებს: ტედი (ჯეისონ სუდეიკისი) სათავეში ჩაუდგება AFC Richmond-ის ახალ, ქალთა საფეხბურთო გუნდს.

კადრი Ted Lasso-ს მეოთხე სეზონიდან

ფოტო: Apple TV

მე-4 სეზონში მაყურებელი იხილავს როგორც ძველ, ისე ახალ მსახიობებს. ჯეისონ სუდეიკისის გარდა, სერიალში ბრუნდებიან ჰანა უოდინგემი, ჯუნო ტემპლი, ბრეტ გოლდსტინი, ბრენდან ჰანტი და ჯერემი სვიფტი. ახალ სახეებს შორის არიან ტანია რეინოლდსი, ჯუდ მაკი, ფეი მარსეი, რექს ჰეიზი, აისლინგ შარკი, ები ჰერნი და გრანტ ფილი. კრეატიულ გუნდს ასევე შეუერთდა სატელევიზიო კომედიებზე, მათ შორის 30 Rock-სა და Modern Family-ზე მუშაობით ცნობილი ჯეკ ბერდიტი, რომელიც აღმასრულებელი პროდიუსერის როლს შეასრულებს. მისი დამატება Apple TV-სთან გაფორმებული "ახალი საერთო კონტრაქტის" ნაწილია.

Ted Lasso მეოთხე სეზონით ზაფხულში ბრუნდება

ფოტო: Apple TV+

ასევე ნახეთ: Pluribus — თავაზიანი აპოკალიფსი ვინს გილიგანისგან

ეს ამბავი იმ ფონზე ვრცელდება, როცა Apple ცდილობს საკუთარი სტრიმინგ-სერვისის მასშტაბის გაფართოებას: განხორციელდა რებრენდინგი, გაიზარდა ინტერესი ლაივ-სპორტის მიმართ და დაემატა მაღალი პროფილის სერიალები, მათ შორის Pluribus, Breaking Bad-ის შემქმნელის, ვინს გილიგანის ახალი პროექტი. ფართო აუდიტორიაზე გათვლილი კომედიური სერიალის, Ted Lasso-ს დაბრუნება ამ სტრატეგიას კარგად ერგება — თუმცა ჯერ კიდევ გასარკვევია, შეძლებს თუ არა მისი მეორე სიუჟეტური ეტაპი ისეთივე წარმატებას, როგორიც დებიუტი იყო.

თუ სერიალებს თვალს აქტიურად ადევნებ, არ დაგავიწყდეს, შემოიხედო ჩვენს ჯგუფშიც – ერთი სერიაც და…