მკაცრი ზამთრის და ქარიშხლის შედეგად, აშშ-ის ცენტრალურ და აღმოსავლეთ რეგიონებში, სადაც დიდთოვლობის შედეგად ტემპერატურა ნულს ქვემოთაა, 38 ადამიანი დაიღუპა. ამის შესახებ ინფორმაციას Reuters ავრცელებს.

ქარიშხალმა და თოვლმა საავტომობილო მოძრაობის პარალიზება და ავიარეისები მასობრივად გაუქმება გამოიწვია.

27 იანვარს, საგანგებო სამსახურებმა რესურსების მობილიზება დაიწყეს, რათა მოსახლეობის, განსაკუთრებით კი უსახლკაროების, უსაფრთხოებაზე ეზრუნათ. ქვეყნის მასშტაბით 550 000-ზე მეტ სახლსა და ბიზნესს ელექტროენერგია არ მიეწოდება.

ნიუ-იორკის მერის ზოჰრან მამდანის განცხადებით, ნიუ-იორკში გარდაცვალების ათი ფაქტი დაფიქსირდა, სადაც ტემპერატურა ბოლო რვა წლის განმავლობაში ყველაზე დაბალ ნიშნულზე, -13 გრადუსამდე დაეცა.

მიუხედავად იმისა, რომ ათივე გარდაცვლილი ღია სივრცეში იპოვეს, ჯერჯერობით უცნობია, იყვნენ თუ არა ისინი უსახლკაროები. მამდანმა ჟურნალისტებს განუცხადა, რომ გარდაცვლილთა ნაწილს წარსულში ჰქონდა შეხება თავშესაფრის სისტემასთან, თუმცა აღნიშნა, რომ ჯერ ნაადრევია დასკვნების გამოტანა ან სიკვდილის მიზეზებზე საუბარი.

მამდანის განცხადებით, 19 იანვრის შემდეგ, ქალაქის ქუჩებსა და მეტროში მცხოვრები 4 000-ზე მეტი უსახლკაროდან დაახლოებით 500 თავშესაფრებში გადაიყვანეს. განსაკუთრებული რისკის ქვეშ მყოფ 350 ადამიანს, რომლებსაც ჯანმრთელობის პრობლემები აქვთ, სოციალური მუშაკები ორ საათში ერთხელ ამოწმებენ.

აშშ-ის მასშტაბით ქარიშხალთან დაკავშირებული გარდაცვალების მიზეზები განსხვავებული იყო — ჰიპოთერმიიდან და სიცივის ზემოქმედებიდან დაწყებული, თოვლის გაწმენდის დროს განვითარებული გულის შეტევებით დასრულებული.

ტეხასის შტატის ქალაქ ბონემში, დალასიდან დაახლოებით 90 კილომეტრში, შაბათ–კვირას ყინულით დაფარულ წყალში ჩავარდნის შედეგად 3 არასრულწლოვანი დაიღუპა. ადგილობრივი სახანძრო სამსახურის ცნობით, შემთხვევის ზუსტი გარემოებები ჯერ უცნობია.

ტეხასის შტატის დედაქალაქ ოსტინში ერთი ადამიანი მიტოვებულ ბენზინგასამართ სადგურში თავშესაფრის ძიებისას, სავარაუდოდ, ჰიპოთერმიით დაიღუპა. ადგილობრივი მედიის ცნობით, ჰიპოთერმიით გარდაცვალების შემთხვევები დაფიქსირდა ასევე კანზასში, კენტუკიში, ლუიზიანაში, მისისიპიში, სამხრეთ კაროლინაში, ტენესიში და მიჩიგანში.