1-ელ მარტს უჩა ნანუაშვილმა სახალხო დამცველის ოფისში გამართულ პრეზენტაციაზე ადიგენში შექმნილ ვითარებაზე ჟურნალისტების შეკითხვებს უპასუხა.

ომბუდსმენის ინფორმაციით, აპარატის წარმომადგენელი ადიგენში იმყოფება და ადგილზე სწავლობს მდგომარეობას:

"დროული რეაგირება არის მნიშვნელოვანი და გამოძიება უმოკლეს დროში უნდა დასრულდეს. ზოგადად მნიშვნელოვანია არა მხოლოდ გამოძიება, არამედ ძალადობის ესკალაციის პრევენცია. აღნიშნულ რაიონში უკვე რამდენიმე მსგავსი ინციდენტი მოხდა წარსულში და ეს ხელისუფლებისთვის უნდა იყოს დამაფიქრებელი, თუ რატომ ხდება ამ მუნიციპალიტეტში ამდენი ინციდენტი".

უჩა ნანუაშვილის თქმით, სახალხო დამცველის აპარატი უახლოეს მომავალში ხელისუფლებას სპეციალური განცხადებით მიმართავს.

"ჩვენი ინფორმაციით, ბევრ მსგავს ინციდენტზე გამოძიება არ დასრულებულა. ჩვენ ვუთითებდით, რომ ამ მიმართულებით სამართალდამცავების მუშაობა არ იყო ეფექტიანი, როდესაც არ ხდება რეაგირება და კონკრეტული ფაქტების ბოლომდე, ობიექტურად გამოძიება და სამართალდარღვევის დასჯა, სამწუხაროდ ვიღებთ ახალ ინციდენტებს. როდესაც რამდენჯერმე ადეკვატური რეაგირება არ მოხდა, რელიგიურ ნიადაგზე მომხდარ დაპირისპირებებს არ გაეცა პასუხი ხელისუფლების მხრიდან, დღეს ვიღებთ ამას. ნებისმიერი წაყრუება არის წახალისება ასეთი დანაშაულის" - განაცხადა უჩა ნანუაშვილმა.

29 თებერვალს სოფელ ადიგენში ქრისტიან და მუსლიმ მოსახლეობას შორის სასაფლაოს ტერიტორიის გამოყოფასთან დაკავშირებით დაპირისპირება დაიწყო. ადგილობრივი მოსახლეობის ნაწილი მუსლიმ თანამოქალაქეებს რელიგიური მოტივით სასაფლაოს ცალკე მოწყობის საშუალებას არ აძლევს. უთანხმოება ფიზიკურ ანგარიშსწორებაში გადაიზარდა. დაზარალებულია 3 მუსლიმი, მათგან ერთ-ერთი კი საავადმყოფოში გადაიყვანეს.

გამოძიება სისხლის სამართლის კოდექსის 156-ე მუხლის პირველი ნაწილით დაიწყო, რაც ადამიანის სიტყვის, აზრის, სინდისის, აღმსარებლობის, რწმენის ამ მრწამსის გამო დევნას ანდა პოლიტიკურ, საზოგადოებრივ, პროფესიულ, რელიგიურ ან მეცნიერულ მოღვაწეობასთან დაკავშირებულ დევნას გულისხმობს და ისჯება ჯარიმით ან თავისუფლების შეზღუდვით/თავისუფლების აღკვეთით ორ წლამდე.