სოკარ ენერჯი ჯორჯიას განცხადებით, გავრცელებული ინფორმაცია, რომ სოკარ ენერჯი ჯორჯიას უსაფრთხოების სამსახური საქართველოდან გატაცებულ აზერბაიჯანელ ჟურნალისტს, აფგან მუხტარლის, უთვალთვალებდა, სიმართლეს არ შეესაბამება. კომპანიის პრესსამსახურის განცხადებას პირველი არხი ავრცელებს.

"გარკვეული სააგენტოების მიერ ვრცელდება ინფორმაცია, თითქოს, სოკარ ენერჯი ჯორჯიას უსაფრთხოების სამსახური ახორციელებდა თვალთვალს ვინმე აფგან მუხტარლიზე. ვაცხადებთ, რომ გავრცელებული ინფორმაცია არის სიცრუე და ცილისწამება, არ შეესაბამება სინამდვილეს და სოკარ ენერჯი ჯორჯიას მომხდართან არანაირი კავშირი არ გააჩნია. ზემოაღნიშნულ გარემოებასთან დაკავშირებით, დამატებითი კითხვების არსებობის შემთხვევაში, გთხოვთ, მიმართოთ საქართველოს სამართალდამცავ ორგანოებს" - წერია განცხადებაში.

აფგან მუხტარლი აზერბაიჯანის ხელისუფლების მიერ დევნილი ჟურნალისტია, რომელიც თავს თბილისს აფარებდა ოჯახთან ერთად. მისი ცოლის, ლეილა მუსტაფაევას თქმით, აფგანი თბილისში, სოლოლაკის ტერიტორიიდან 29 მაისს დაიკარგა, მოგვიანებით კი აღმოჩნდა, რომ ის აზერბაიჯანშია დაპატიმრებული საზღვრის უკანონოდ კვეთის ბრალდებით. მუსტაფაევას აინტერესებს, როგორ გადაკვეთა მუხტარლიმ საქართველო-აზერბაიჯანის საზღვარი მაშინ, როცა მისი პასპორტი თბილისში, სახლში ჰქონდა დატოვებული. თავად მუხტარლიმ აზერბაიჯანში ადვოკატს უთხრა, რომ ის ნაცემია.

საქართველოს შინაგან საქმეთა სამინისტრო ამბობს, რომ მათ გამოძიება ადამიანის თავისუფლების უკანონოდ აღკვეთის მუხლით დაიწყეს, თუმცა, ჯერ არ განუმარტავთ, როგორ აღმოჩნდა თბილისში დაკარგული ჟურნალისტი ბაქოს ციხეში. აფგან მუხტარლი ჯერ კიდევ რამდენიმე დღის წინ ამბობდა, რომ აზერბაიჯანის ხელისუფლების მიერ დევნილ პირებს საქართველოში საფრთხე ემუქრებათ, რადგან მათ თავშესაფარს არ აძლევენ და უკან, აზერბაიჯანში აბრუნებენ, სადაც წამება და მრავალწლიანი პატიმრობა ელოდებათ.

აფგან მუხტარლის აზერბაიჯანის პროკურატურამ სამი ბრალი წაუყენა, სასამართლომ კი ჟურნალისტს სამთვიანი წინასწარი პატიმრობა შეუფარდა.