საქართველოს ახალგაზრდა იურისტთა ასოციაციაში მიაჩნიათ, რომ დემირელის კოლეჯის დაკავებული მენეჯერი საქართველომ თურქეთს არ უნდა გადასცეს. საქართველოს სამართალდამცავებმა დემირელის კოლეჯის მენეჯერი, მუსტაფა ემრე ჩაბუქი რამდენიმე დღის წინ დააკავეს. მას ტერორისტულ ორგანიზაციასთან კავშირი ედება ბრალად.

საია მიიჩნევს, რომ მოცემულ საქმეში საექსტრადიციო პატიმრობის შეფარდება დაუსაბუთებელია. ორგანიზაციაში აღნიშნავენ, რომ საქმის კონტექსტის და თურქეთში არსებული ვითარების გათვალისწინებით, მუსტაფა ემრე ჩაბუქის თურქეთისთვის გადაცემის შემთხვევაში არსებობს მისი უფლებების შელახვის რეალური საფრთხე. შესაბამისად, საქართველომ არ უნდა მოახდინოს მისი ექსტრადირება.

დემირელის კოლეჯის ხარისხის მართვის მენეჯერს, მუსტაფა ემრე ჩაბუქს თბილისის საქალაქო სასამართლომ წინასაექსტრადიციო სამთვიანი პატიმრობა 25 მაისს შეუფარდა. მოსამართლემ პროკურატურის შუამდგომლობა დააკმაყოფილა.

მუსტაფა ემრე ჩაბუქის გასათავისუფლებლად ონლაინ პეტიცია შეიქმნა. "მუსტაფა ემრე ჩაბუქი არის უდანაშაულო და ის უნდა გათავისუფლდეს დაუყოვნებლივ," - ამ მოთხოვნით ონლაინ პეტიციის ხელმომწერები საქართველო პრეზიდენტს, პარლამენტის თავმჯდომარეს და იუსტიციის მინისტრს დემირელის სკოლის თურქი მენეჯერის გათავისუფლებას სთხოვენ.