საქართველოს სახალხო დამცველი, უჩა ნანუაშვილი მიიჩნევს, ევროპის უმეტესი ქვეყნების კონსტიტუციებისგან განსხვავებით, სოციალური უფლებების შესახებ საქართველოს კონსტიტუციაში არსებული ჩანაწერი არასრულყოფილი და სუსტია. ამასთან დაკავშირებით, ომბუდსმენმა ვენეციის კომისიას წერილი გაუგზავნა, სადაც, სხვა საკთხებთან ერთად, შრომით უფლებებსა და ქორწინების ცნებას უსვამს ხაზს.

სახალხო დამცველი გამოყოფს შრომითი უფლებების დაცვისთვის ქმედითი სახელმწიფო ზედამხედველობის მექანიზმის შექმნის საკითხს, რაც არ ასახულა კონსტიტუციის ცვლილებების პროექტში.

ვენეციის კომისიისადმი მიმართვაში ომბუდსმენი ხაზს უსვამს, რომ ადამიანის უფლებათა დაცვის მაღალი სტანდარტის უზრუნველსაყოფად მნიშვნელოვანია კონსტიტუციის მეორე თავში დარჩეს ორი ჩანაწერი:

  1. ჩანაწერი, რომლის მიხედვით, საარსებო მინიმუმით უზრუნველყოფის პირობები განისაზღვრება კანონით, ხოლო სახელმწიფო ხელს უწყობს უმუშევრად დარჩენილ საქართველოს მოქალაქეს დასაქმებაში.
  2. ჩანაწერი, რომლის მიზანია უზრუნველყოს უფლებებისა და თავისუფლებების დაცვა იმ შემთხვევაში თუ ეს პირდაპირ არ არის გათვალისწინებული კონსტიტუციით, მაგრამ გამომდინარეობს კონსტიტუციური პრინციპებიდან და ადამიანის უფლებების სფეროში სახელმწიფოს მიერ ნაკისრი საერთაშორისო ვალდებულებებიდან.

ომბუდსმენი ყურადღებას ამახვილებს რელიგიის თავისუფლებისა და სეკულარიზმის საკითხებზე. მისი აზრით, კონსტიტუციის მოქმედი რედაქციის მე-9 და მე-19 მუხლებში განხორციელებული ცვლილებები რწმენისა და აღმსარებლობის თავისუფლებისა და სეკულარიზმის პრინციპების შესუსტებას უწყობს ხელს.

უჩა ნანუაშვილი უარყოფითად აფასებს წარმოდგენილი პროექტის მიხედვით, ქორწინების ცნების, როგორც ქალისა და მამაკაცის კავშირის, კონსტიტუციით რეგულირებას. მისი აზრით, მსგავსი ჩანაწერი ხელს შეუწყობს ჰომოფობიური განწყობებისა და ლგბტ პირთა მიმართ ნეგატიური დამოკიდებულების გაზრდას.

სახალხო დამცველი მნიშვნელოვნად მიიჩნევს სამართალდამცავთა მიერ წამების და არასათანადო მოპყრობის ფაქტებზე დამოუკიდებელი საგამოძიებო მექანიზმის შექმნის და საკონსტიტუციო სასამართლოს უფლებამოსილების გაფართოების საკითხებს.

ომბუდსმენი საფრთხის შემცველად მიიჩნევს, უზენაესი სასამართლოს მოსამართლეობის კანდიდატების საქართველოს პარლამენტისთვის წარდგენის უფლებამოსილების იუსტიციის უმაღლესი საბჭოსთვის მინიჭებას.

უჩა ნანუაშვილი საქართველოს სახალხო დამცველის საქმიანობის მარეგულირებელ მუხლში დაგეგმილ ცვლილებებს ინსტიტუტის მანდატის გაძლიერების ნაცვლად, უფლებამოსილების შესუსტების მცდელობად აფასებს.