სასარგებლო წიაღისეულის უკანონოდ (ულიცენზიოდ) მოპოვებისთვის, ნადირობის წესების დარღვევისათვის ადმინისტრაციული პასუხისმგებლობის გამკაცრება იგეგემება. გარემოსა და ბუნებრივი რესურსების დაცვის სამინისტროს სისტემის დაწესებულებებს შეეძლებათ დარღვევის აღმოჩენის შემთხვევაში პირი დააჯარიმონ. ამის შესახებ საქართველოს პრემიერ-მინისტრმა, გიორგი კვირიკაშვილმა მთავრობის სხდომაზე ისაუბრა.

მისივე თქმით, ადმინისტრაციული პასუხისმგებლობა მკაცრდება ავტოსატრანსპორტო საშუალებიდან ნარჩენებით გარემოს დაბინძურების შემთხვევაშიც. თუმცა, მას არ აღუნიშნავს კონკრეტულად რა სანქციები იგეგმება.

"ვფიქრობთ, ეს ცვლილებები არის ძალიან მნიშვნელოვანი, გამომდინარე იქედან, რომ ჩვენ გვაქვს პრეტენზია გავხდეთ მნიშვნელოვანი ტურისტული ქვეყანა და ვართ კიდეც. ყოვლად მიუღებელია გარემოს დაბინძურების ის მაჩვენებელი, რომელიც ჩვენ გვაქვს," - განაცხადა პრემიერ-მინისტრმა.

მისი თქმით, მან ადგილობრივ თვითმმართველობებს, გამგებლებს დაავალა მიხედონ თავიანთ რაიონებში მაგისტრალის გარშემო დაბინძურების საკითხებს.