საქართველოს შინაგან საქმეთა სამინისტრო 2016 წლის 24 დეკემბერის ინციდენტს, რომელშიც აუდიტის სახელმწიფო სამსახურის ხელმძღვანელი, ლაშა თორდია მონაწილეობდა, მუქარის მუხლით იძიებს.. ამის შესახებ On.ge-ს შსს-ში განუცხადეს. ამ შემთხვევის ამსახველი კადრები სოციალურ ქსელებში დღეს გავრცელდა.

შსს-ს ინფორმაციით, მათ გამოძიება იმ შეტყობინების საფუძელზე დაიწყეს, რომელიც ფალიაშვილზე მდებარე კაფის თანამშრომლისგან მიიღეს. განმცხადებელი აღნიშნავდა, რომ უცნობმა პირმა იარაღი დაუმიზნა და დაემუქრა. უწყების ინფორმაციით, გამოძიება იმავე დღეს დაიწყო და გამოიკითხნენ ბარის თანამშრომლები.

"ჩვენებებით, მათთვის [ბარის თანამშრომლებისთვის] უცნობი მამაკაცი ბარში მუსიკისთვის ხმის არ აწევის გამო იარაღით ხელში თავს დაესხა დ.გ.-ს და იარაღი სახის არეში რამდენჯერმე დაუმიზნა. აღნიშნული პირი ძლიერ ნასვამი იყო და სიტუაციის განმუხტვა შესაძლებელი გახდა მხოლოდ მისი თანხმლები პირის ჩარევის შედეგად. მოწმეების ჩვენებით, ხსენებული მამაკაცი აგრესიულად იქცეოდა და მისი მხრიდან დ.გ-ზე განხორციელებულმა თავდასხმამ მათში მუქარის განხორციელების რეალური შიში გამოიწვია," - აღნიშნავენ შსს-ში.

მათივე ინფორმაციით, განვითარებული მოვლენების ამსახველი, შიდა და გარე პერიმეტრზე დამონტაჟებული სათვალთვალო კამერების მიერ გადაღებული ვიდეომასალა, მტკიცებულების სახით, სისხლის სამართლის საქმეს დაერთო.

"ამ ეტაპზე, საქმეზე მიმდინარეობს ყველა საჭირო საგამოძიებო მოქმედება, მათ შორის, დანიშნულია ჰაბიტოსკოპიური და ფონოსკოპიური ექსპერტიზა ვიდეოკადრების ავთენტურობის დადგენის მიზნით. გამოძიების შედეგების შესახებ საზოგადოებას დამატებით ეცნობება," - აღნიშნავენ უწყებაში.

სახელმწიფო აუდიტის სამსახურის ხელმძღვანელმა, ლაშა თორდიამ მისი მონაწილეობით გავრცელებულ ვიდეო საქართველოს ყოფილ პროკურორთან ოთარ ფარცხალაძესთან ინციდენტს დაუკავშირა. მისი თქმით, საქართველოს მთავარმა პროკურორმა, ირაკლი შოთაძემ ვიდეოკადრები "სხვისი ხელით დადო". როგორც თორდია ამბობს, ინციდენტი, რომელიც სოციალურ ქსელში გამოქვეყნებულ ვიდეოშია ასახული, 2016 წლის ზამთარში მოხდა.

ამ ვიდეოკადრების გავრცელებას წინ უსწრებდა საქართველოს მთავარ პროკურორს, ოთარ ფარცხალაძესა და ლაშა თორდიას შორის ინციდენტი. თორდიას ინციდენტს თავის სამსახურებრივ საქმიანობას უკავშირებს და ამბობს, რომ პირველმა ფარცხალაძემ დაარტყა.