თბილისის მერია 26 მაისის აღსანიშნავად 473 ათას ლარს დახარჯავს. ღონისძიებისთვის მომსახურებების შეძენა პირდაპირი სახით, ტენდერის გარეშეა გადაწყვეტილი. მერიამ შესაბამისი თანხმობა უკვე მიიღო შესყიდვების სააგენტოსგან.

"ღონისძიებებისა და კვალიფიციურ შემსრულებელთა სპეციფიკიდან გამომდინარე, შესყიდვის წინასწარ დაგეგმვა შეუძლებელი იყო," - ასე ხსნიან მერიაში თუ რატომ ვერ იქნებოდა მომსახურების წინასწარ დაგეგმვა შესაძლებელი.

მერიაში აღნიშნავენ, რომ საქართველოს დამოუკიდებლობის დღის - 26 მაისისადმი მიძღვნილ ღონისძიებების მაღალი სახელმწიფოებრივი და საზოგადოებრივი მნიშვნელობისაა და მის მაღალ დონეზე ჩატარება ქვეყნისათვის მნიშვნელოვანი სოციალური, კულტურული და სხვა საჯარო მიზნების მიღწევას ემსახურება.

ღონისძიების ფარგლებში იგეგმება „ანბანის“ ინსტალაცია და უცხოენოვანი „ვეფხისტყაოსნის“ გამოცემების მაკეტის მონტაჟი, თემატური ფოტოგადაღების კუთხის, საბავშო სივრცის „არქეოლოგია ბავშვებისთვის“ და ნახატების აუქციონის მოწყობა ცნობილი მხატვრების მიერ ადგილზე შესრულებულ ნამუშევრებზე. გარდა ამისა, პანტომიმის სახელმწიფო თეატრი მოაწყობს „ცოცხალი ქანდაკებების შოუს“ სახელწოდებით „ვეფხისტყაოსნის გმირები“. ამავე დღეს გაიმართება სხვადასხვა ჟანრის კონცერტები, რომლებიც, დღის ბოლოს, გრანდიოზული გალა კონცერტითა და ფოიერვერკით დასრულდება. როგორც თბილისის მერიაში აცხადებენ, გალაკონცერტი საზოგადოებრივი მაუწყებლის პირველი არხის პირდაპირ ეთერში გადაიცემა.

ფოტო: შესყიდვების სააგენტო/ On.ge