ინფორმაციას CNN ბაიდენის ადმინისტრაციის მაღალჩინოსანზე დაყრდნობით ავრცელებს.

რატომ არის მნიშვნელოვანი: აშშ-ის დაზვერვის მონაცემების თანახმად, 2014 წლიდან დღემდე კრემლმა უცხო ქვეყნის პოლიტიკურ პარტიებს 300 მილიონ დოლარზე მეტი გადაურიცხა.

  • მათი თქმით, რუსეთის მიზანია, რომ კონკრეტული პოლიტიკური პარტიები გამოიყენოს, ამ ქვეყნებში დემოკრატიას ძირი გამოუთხაროს და კრემლის სასარგებლოდ მოახდინოს პოლიტიკურ პროცესებზე გავლენა.

დეტალები: როგორც მედია წერს, რუსეთმა მილიონობით დოლარი, მინიმუმ, 20 ქვეყნის პოლიტიკურ პარტიებზე, მაღალჩინოსნებსა და პოლიტიკოსებზე დახარჯა.

  • აშშ-ის სახელმწიფო დეპარტამენტის ცნობით, ეს თანხა, შესაძლოა, გაცილებით მეტი იყოს;
  • ქვეყნების ჩამონათვალი გასაჯაროებული არ არის, თუმცა აშშ აცხადებს, რომ ამ სიაში მოხვედრილ ქვეყნებს კრემლის ნაბიჯების შესახებ ინფორმაციას გაუზიარებენ;
  • ანგარიშში ნათქვამია, რომ თანხის გადაცემა, ასევე, რუსეთის საელჩოს რესურსებით ხდება — მაგალითად, ერთ-ერთ აზიურ ქვეყანაში საპრეზიდენტო კანდიდატს რუსეთის ელჩმა მილიონობით დოლარი გადასცა.