ბოლო რამდენიმე თვის განმავლობაში საზოგადოების ერთ-ერთი განხილვის თემა ილონ მასკის პირადი ცხოვრება გახდა. ცოტა ხნის წინ გამოცემა The Wall Street Journal-მა დაწერა, რომ ილონ მასკს გუგლის თანადამფუძნებლის, სერგეი ბრინის ცოლთან ჰქონდა რომანი. გამოცემის მიხედვით, სწორედ ეს გახდა წყვილის დაშორების მიზეზი.

ილონ მასკმა ბრალდებები უარყო, გამოცემებს ბრინთან ერთად გადაღებული ფოტო გაუგზავნა და განაცხადა, რომ ისინი მეგობრობენ და მის ცოლთან ურთიერთობა არ ჰქონია.

ეს ილონ მასკის გარშემო ატეხილი ერთადერთი სკანდალი როდია. ივლისის დასაწყისში ინფორმაცია გავრცელდა, რომ მასკს Neuralink-ის აღმასრულებელ დირექტორთან, შივონ ზილისთან, ტყუპი შვილი ეყოლა. მაისში კი გამოცემები წერდნენ, რომ SpaceX-მა თვითმფრინავის გამცილებელს $250,000 გადაუხადა მას შემდეგ, რაც მან მასკს ბრალი სექსუალურ შევიწროებასა და სექსის შეთავაზებაში დასდო.

როგორც ჩანს, მსგავსი ამბების მოსმენამ თავად ილონიც შეაწუხა და მან უკმაყოფილება ტვიტერზე გამოხატა.

"უდიდეს ყურადღებას ვიღებ, რაც საშინელებაა. სამწუხაროდ, ჩემ შესახებ დაწერილ ყველაზე უმნიშვნელო სტატიებსაც უამრავი ადამიანი ნახულობს. ვეცდები, ცივილიზაციისთვის სასარგებლო საქმეებით დავკავდე", — წერს მასკი ტვიტერზე.