ალბათ, ორი აზრი არ არსებობს, რომ მარველის სამყაროს ერთ-ერთი ყველაზე გამორჩეული, დასამახსოვრებელი და საინტერესო პერსონაჟი ლოკია. ტომ ჰიდლსტონის პერსონაჟმა მარველის ფილმებში გამოჩენის გარდა, მაყურებელს თავი საკუთარი სერიალითაც შეაყვარა. სწორედ სერიალ Loki-ში გავიგეთ, რომ ლოკი ბისექსუალია.

სერიალის მესამე ეპიზოდში ლოკი ამბობს, რომ რომანტიკული ურთიერთობა "პრინცებთანაც ჰქონია და პრინცესებთანაც". ლოკის დაქამინგაუთებამ ზოგიერთი ფანი იმედგაცრუებული დატოვა. მათი თქმით, სერიალში პერსონაჟის სექსუალურ ორიენტაციას მეტად არ ჩაღრმავებიან და შემქმნელები მხოლოდ ერთი ფრაზით შემოიფარგლნენ.

თავად ტომ ჰიდლსტონი ბედნიერია, რომ ლოკი სერიალში დაქამინგაუთდა, მიუხედავად იმისა, რომ, მისი თქმით, ეს მხოლოდ პატარა ნაბიჯია.

"ადრე, როცა ჩემი პერსონაჟის შესახებ ძველ მითებში ვკითხულობდი, ლოკის იდენტობა ყოველმხრივ ფლუიდური იყო, მათ შორის, გენდერისა და სექსუალური ორიენტაციის კუთხითაც. ეს პერსონაჟის უძველესი ნაწილია, რაც, რომ დავფიქრდი, ჩვენ მიერ მოყოლილ ამბებში არ ჩანდა. ამიტომ ძალიან გახარებული და პრივილეგირებულიც ვიყავი, როცა ეს სერიალში აღვნიშნეთ", — თქვა ტომ ჰიდლსტონმა გამოცემა Variety-ის გადაცემაში, სახელად Actors on Actors.

ტომი თვლის, რომ მარველის სამყარომ ის რეალობა უნდა გვიჩვენოს, რომელშიც ვცხოვრობთ:

"ეს ძალიან პატარა ნაბიჯია. უფრო მეტი რამაა გასაკეთებელი. მარველის სამყარომ ის მსოფლიო უნდა გვიჩვენოს, რომელშიც ვცხოვრობთ. ამიტომ დიდი პატივი იყო, ამ დეტალის აღნიშვნა. ეს ჩემთვის ძალიან მნიშვნელოვანი იყო", — განაცხადა მსახიობმა.

ტომს იმედი აქვს, რომ ეს მხოლოდ დასაწყისი იქნება და ლგბტქ+ ადამიანების ისტორიების მოყოლაში მარველის პერსონაჟები საკუთარ წვლილს შეიტანენ.

"იმედი მაქვს, რომ, სულ მცირე, კარი მაინც გავაღეთ და უფრო მეტ ისტორიას მოვისმენთ", — თქვა ტომმა.