ევროპის მაუწყებელთა გაერთიანება (EBU) რუსეთსა და უკრაინას დასჯით ემუქრება. ამის შესახებ ინფორმაციას გერმანიის საზოგადოებრივი მაუწყებელი ZDF Heute ავრცელებს. ევროვიზიის მასპინძელი უკრაინის დასჯის მიზეზი შეიძლება გახდეს რუსეთის წარმომადგენლის ქვეყანაში არშეშვება.

"უკრაინის პოზიცია სამართლებრივი გარემოებიდან გამომდინარე გასაგებია, მაგრამ EBU-ს პერსპექტივიდან ეს მაინც ნორმების დარღვევაა," - ამბობს საორგანიზაციო კომიტეტის წევრი.

მისივე თქმით, მასპინძელი ქვეყნის რანგში, უკრაინამ აიღო ვალდებულება ყველა მონაწილის გამოსვლის უზრუნველყოფისა, თუმცა არ შეასრულა ის რუსეთი წარმომადგენლის მიმართ. რუსეთმა კი უგულვებელყო ევროვიზიის წესები, რადგან მისი წარმომადგენლები არ ესწრებოდნენ სავალდებულო შეხვედრებს წლის დასაწყისში.

საორგანიზაციო კომიტეტის წევრის თქმით, სანქციებზე გადაწყვეტილება ჯერ მიღებული არ არის, მაგრამ ამ საკითხს აუცილებლად განიხილავენ მომავალ კვირას. სანქციებად ფულადი ჯარიმა, კონკურსში მონაწილეობის სამ წლამდე შეზღუდვა და სასპონსორო დახმარების შეჩერება განიხილება.

უკრაინამ ევროვიზიაზე რუსეთის წარმომადგენელს ქვეყანაში შესვლა სამი წლით აუკრძალა. მიზეზად კი 2014 წელს ანექსირებულ ყირიმში იულია სამოილოვას მიერ კონცერტის გამართვა დაასახელა.