მოძრაობა თავისუფლებისთვის - ევროპული საქართველოს წევრი, ირმა ნადირაშვილი, სამინისტროებიდან ოპტიმიზაციის ფარგლებში გათავისუფლებული თანამშრომლების შესახებ აცხადებს, რომ მათ ნაცვლად სამსახურებში პარლამენტის კომიტეტის თავმჯდომარეების მეუღლეები დასაქმდნენ.

ნადირაშვილის თქმით, მათ პარტიას საჯარო უწყებებში თანამშრომლების ოპტიმიზაციის პროცესის შესახებ ფრაგმენტული ინფორმაცია აქვთ. ის უარყოფითად აფასებს ამ პროცესში მთავრობის მიერ ერთიანი სქემის არ არსებობას და საჯარო უწყების ხელმძღვანელი პირების მიერ გადაწყვეტილებებისის თავიანთი ნება-სურვილით მიღებაზე საუბრობს.

"ჩვენ ვთვლით რომ ეს პროცესი ჩატარდა გაუმჭვირვალედ, არასათანადოდ. სამსახურიდან გაუშვეს ის ადამიანები ვისაც პატრონი არ ჰყავდა და ვინც ვერ დაურეკა მინისტრს. უფრო მძიმე ფაქტებიც გვაქვს რომელიც საზოგადოებამ არ იცის,"- განაცხადა ნადირაშვილმა.

საქართველოს ახალგაზრდა იურისტთა ასოციაციის კვლევის მიხედვით, რეორგანიზაციის პროცესში საქართველოს ხუთი სამინისტროდან 2 300 საჯარო მოხელე გათავისუფლდა. თავდაცვის; ოკუპირებული ტერიტორიიდან იძულებით გადაადგილებულ პირთა, განსახლებისა და ლტოლვილთა სამინისტროს; რეგიონული განვითარებისა და ინფრასტრუქტურის; კულტურისა და ძეგლთა დაცვის და საგარეო საქმეთა სამინისტროდან გათავისუფლებულ თანამშრომლებს კომპენსაციის სახით ჯამში 322 300 ლარი გადაუხადეს.