ბოლო სამი ათწლეულის განმავლობაში თიბისი ამტკიცებს, რომ კომპანიისთვის ახალი თაობის მხარდაჭერა ერთ-ერთი პრიორიტეტული საკითხია. ამ წლებში, კომპანიის ხელშეწყობით, ასობით ნიჭიერმა ახალგაზრდამ გადადგა ნაბიჯები წარმატებისკენ, დღეს კი ისინი ისეთ სფეროების წამყვანი სპეციალისტები არიან, როგორებიცაა პროგრამირება, მეცნირება, ხელოვნება და სპორტი.

"თიბისი დიდი სიამაყით აგრძელებს ამ პროექტს, ნიჭიერი ახალგაზრდების მხარდაჭერა ჩვენი კორპორაციული სოციალური პასუხისმგებლობის ნაწილია. მოხარული ვარ, რომ ყოველწლიურად გვემატებიან ისეთი მოზარდები, რომლებსაც თავიანთი ნიჭითა და ცოდნით პოზიტიური ცვლილებების მოტანა შეუძლიათ, ჩვენ კი მათთვის ამ შესაძლებლობების შექმნას ვუწყობთ ხელს", — განაცხადა ვახტანგ ბუცხრიკიძემ, თიბისის გენერალურმა დირექტორმა.

2019 წლიდან თიბისის სტიპენდიატების პროგრამაში 380 მოზარდია ჩართული. ისინი მთელი საქართველოს მასშტაბით 14 სხვადასხვა საერთაშორისო და საგანმანათლებლო ორგანიზაციის ჩართულობით შეირჩნენ. თიბისის სტიპენდიატებს სხვადასხვა მისწრაფებები აქვთ, თუმცა მათ მიზანდასახულობა და განსაკუთრებული ნიჭი აერთიანებთ.

"ძალიან მიყვარს ალგორითმებზე მუშაობის პროცესი, როდესაც ამოუხსნელ კითხვებს პასუხს სცემ. გამომგონებლობა პატარაობიდანვე მიტაცებდა. მიხარია, რომ თიბისის სტიპენდიატების პროგრამისთვის შემარჩიეს", — ამბობს 16 წლის საბა ხაბურზანია სენაკიდან.

"ჩემი მიზანი ამერიკაში სამშენებლო ინჟინერიის სწავლაა და ამისთვის ყველაფერს ვაკეთებ. თიბისის სტიპენდია ჩემი მიზნების ასრულებაში მეხმარება", — ამბობს 17 წლის ეკატერინე ჩაჩაური თელავიდან.

წელს პროგრამაში უკრაინელი ახალგაზრდებიც ჩაერთვებიან, რომლებიც, შექმნილი მდგომარეობის გამო, ამჟამად, საქართველოში იმყოფებიან.

თიბისისთვის მნიშვნელოვანია ისეთი პროექტების განხორციელება, რომლებიც ახალი თაობის გაძლიერებას და განვითარებას შეუწყობს ხელს. ზუსტად ასეთ ინიციატივებს მიუძღვნის კომპანია შემდეგ ათწლეულს.