დეპუტატი ელისო ბოლქვაძის განცხადებით, ის უკვე არის იუნესკოს მშვიდობის ელჩი და ამ წოდებას ვერ ჩამოართმევენ. ასე გამოეხმაურა ბოლქვაძე კულტურის სფეროს წარმომადგენლების განცხადებას, რომლებიც მისგან პასუხისმგებლობის აღებას მოითხოვდნენ არსებული პრობლემების გამო.

"მე არ მესმის ეს რაღაცა ისტერიკული შეძახილები, რომ მე მომხსნიან იუნესკოს ელჩობიდან, თუ კი მე... ესე იგი ზეწოლაა ჩემზე, მე თუ ამას არ გავაკეთებ, მაშინ მე მომხსნიან, ჯერ ეს ერთი ვინ მისცათ მაგის უფლება. არავის არ მიუცია, არავისთვის მაგის უფლება. მე ვარ უკვე ელჩი და ვერ ჩამომართმევენ", — ამბობს ბოლქვაძე.

მისივე თქმით, არ იცის, რა დარღვევებზეა საუბარი და ამბობს, რომ წერილი უნდა მისწერონ მას კულტურის სფეროს წარმომადგენლებმა.

სავარაუდოდ, ამ განცხადებამდე, TV პირველის ჟურნალისტმა ჰკითხა, რას ფიქრობდა კულტურის სფეროს წარმომადგენლების მოწოდებაზე. ბოლქვაძემ კი უთხრა, რომ ძალიან სასაცილოა და კომენტარს არ გააკეთებდა.

„ზედამხედველობა რაზე უნდა განვახორციელოთ ჩვენ?... არა რა თქმა უნდა, ჩვენ საკადრო პოლიტიკაში არ ვერევით და სხვა მიმართულებები გვაქვს, კულტურის სამინისტროსაც, რასაც ვახორციელებთ ყოველდღიურად… ჩემი მთავარი ფუნქცია თქვენ ვერ გაგიგიათ", — უთხრა მან TV პირველის ჟურნალისტს.

დღეს, 6 აპრილს კულტურის სფეროს წარმომადგენლებმა ცენზურაზე ისაუბრეს და ბოლქვაძეს მოუწოდეს, აიღოს პასუხისმგებლობა და აღასრულოს კულტურის კომიტეტმა საკუთარი მოვალეობა. მათი თქმით, ის, ვინც თვალს ხუჭავს რეპრესიებზე, არ შეიძლება, მშვიდობის ელჩად იწოდებოდეს.

ბრიფინგზე ითქვა, რომ იმ შემთხვევაში, თუ კონკრეტულ ნაბიჯებს არ გადადგამს ბოლქვაძე კულტურის სფეროში არსებულ პრობლემებზე, ისინი მიმართავენ იუნესკოს და მოითხოვენ დეპუტატს მშვიდობის ელჩის სტატუსი ჩამოერთვას.