უკრაინის საგარეო საქმეთა მინისტრი, დმიტრო კულება ამბობს, რომ თავად ვერც დაადასტურებს და ვერც უარყოფს უკრაინის სავარაუდო მონაწილეობას ბელგოროდში საწვავის საცავზე თავდასხმაში. მისი თქმით, მას არ აქვს ყველა სამხედრო ინფორმაცია.

"მე არ შემიძლია, დავადასტურო ან უარვყო მტკიცება, რომ უკრაინა იყო ჩართული ამაში მხოლოდ იმიტომ, რომ მე არ ვფლობ სრულ სამხედრო ინფორმაციას", — ციტირებს კულებას Reuters.

გუშინ, პირველ აპრილს, გვიან ღამით ხანძარი გაჩნდა უკრაინის საზღვართან ახლოს, რუსეთის ქალაქ ბელგოროდში მდებარე ნავთობბაზაზე. რუსული მხარე თავდასხმაში უკრაინას ადანაშაულებს.

ბელგოროდის ოლქის გუბერნატორი, ვიაჩესლავ გლადკო ამტკიცებს, რომ ნავთობბაზაზე იერიში უკრაინულმა ვერტმფრენებმა მიიტანეს.

პუტინის პრესსპიკერმა, დიმიტრი პესკოვმა განაცხადა, რომ უკრაინული მხარის თავდასხმამ საწვავის საცავზე შესაძლოა, უარყოფითი გავლენა იქონიოს კიევსა და მოსკოვს შორის მოლაპარაკებებზე.

როგორც CNN წერს, მათ უკრაინის თავდაცვის სამინისტროში განუცხადეს, რომ მომხდარის შესახებ ინფორმაცია არ აქვთ.