პრეზიდენტის აზრით, გირჩს აქვს უფლება გადადგას ის ნაბიჯები, რომელიც კონკრეტული იდეის გასამყარებლად სჭირდება. ამის შესახებ On.ge-ს კითხვას პრეზიდენტის პრესსპიკერმა დღეს გამართულ ბრიფინგზე უპასუხა:

"ყველა პარტიას, მათ შორის გირჩს, აქვს უფლება ჩამოაყალიბოს ნებისმიერი ორგანიზაცია, იდეა, დაჯგუფება და შესაბამისად, გირჩის, უფლებაა, რომ ის ნაბიჯები გადადგან, რაც ამ იდეის გასამყარებლად სჭირდებათ," - განაცხადა ეკა მიშველაძემ.

რაც შეეხება სამხედრო სამსახურს, პრეზიდენტმა თინა ხიდაშელის მიერ გაუქმებულ სავალდებულო სამსახურის აღდგენას მხარი დაუჭირა.

გირჩის მიერ რელიგიური ორგანიზაციის დაფუძნების შესახებ ინფორმაცია On.ge-მ 21 აპრილს გაავრცელა. გირჩის წევრებმა 2017 წლის მარტში დააფუძნეს რელიგიური ორგანიზაცია, რომელიც სასულიერო პირებს აკურთხებს და შესაბამის ცნობასაც გასცემს. სასულიერო წოდების მქონე ახალგაზრდები კი, შესაბამისი უწყებებისგან სავალდებულო სამხედრო სამსახურის გადავადებას ითხოვენ და მიზანსაც აღწევენ, რადგან კანონში არსებული ჩანაწერი მათ ამის საშუალებას აძლევს.