ქართული ოცნების დეპუტატმა, ეკა სეფაშვილმა პლენარულ სხდომაზე შინაგან საქმეთა მინისტრსა და მის უწყებას "უსაფრთხო და მშვიდი ცხოვრებისთვის" მადლობა გადაუხადა.

"მე მინდა, პირველ რიგში, თქვენ და თქვენი უწყების თითოეულ თანამშრომელს მადლობა გადაგიხადოთ იმ უსაფრთხო და მშვიდი ცხოვრებისათვის, რაც დღესდღეობით საქართველოს თითოეულ მოქალაქეს აქვს და ვუსურვო მათ წარმატებები შემდგომ მუშაობაში. ასევე, მოგიწოდოთ, რომ სოციალური დაცვის პაკეტები, რაც თქვენს თანამშრომლებს აქვთ, კიდევ უფრო გააძლიეროთ და გააფართოვოთ, იქნება ეს განათლების, ჯანდაცვის თუ სხვა მიმართულებებით, რათა ეს ხალხი, რომელიც დღეს დგას ჩვენი სიმშვიდისა და უსაფრთხოების სადარაჯოზე, სახელმწიფოს მიერ სათანადოდ იყოს დაფასებული და აღიარებული", — განაცხადა სეფაშვილმა.

ამის შემდეგ ქართული ოცნების დეპუტატმა შს მინისტრს ევროინტეგრაციის თვალსაზრისით უწყების მიერ განხორციელებული საქმიანობის შესახებ კითხვაც დაუსვა.

დღეს, 17 მარტს პარლამენტში მინისტრის საათის ფორმატში შინაგან საქმეთა მინისტრს, ვახტანგ გომელაურს უსმენენ.