7 მარტს მთავრობის კანცელარიასთან გამართულ აქციაზე დაკავებული ბაჩი ვალიშვილი სასამართლომ 3 000 ლარით დააჯარიმა. ამის შესახებ ინფორმაცია მოძრაობა სირცხვილიამ გაავრცელა. თავად ბაჩი ვალიშვილმა სასამართლოს დასრულების შემდეგ თქვა, რომ შსს-ს წარმომადგენლებს მის წინააღმდეგ არანაირი მტკიცებულება არ ჰქონდათ.

7 მარტს კანცელარიასთან აქციაზე რამდენიმე პირი ტუალეტის ქაღალდის სროლისა და ფქვილის შეყრის გამო დააკავეს. 8 მარტს დააკავეს მოძრაობა სირცხვილიას წევრი, შოთა დიღმელაშვილი, რომელმაც მთავრობის ადმინისტრაციას კვერცხები ესროლა. დიღმელაშვილს სასამართლომ 4-დღიანი პატიმრობა მიუსაჯა.

დაკავებებს გამოეხმაურა საერთაშორისო გამჭვირვალობა საქართველოს და თქვა, რომ ხელისუფლებამ შერჩევითად, არაპროპორციულად და დაუსაბუთებლად დაკავების პრაქტიკა განაგრძო.