უკრაინაში მიმდინარე ომის შედეგები სატელიტიდან გადაღებული ფოტოების მეშვეობითაც მარტივი დასანახია. სანამ რუსული ჯარი უკრაინაში შეიჭრებოდა, სატელიტით გადაღებულ ფოტოებზე კიევის, ხარკოვის და სხვა დიდი ქალაქების განათებები საკმაოდ კარგად ჩანდა. თუმცა სიტუაცია შეიცვალა და იგივე ქალაქების დანახვა სატელიტიდან უკვე ძალიან რთულია.

ეს ფოტო 25 იანვარსაა გადაღებული, რომელზეც უკრაინის დიდი ქალაქების განათებები თვალშისაცემია.

ფოტო: Earth Observation Group

ეს კი 25 თებერვლის ღამეა, როცა რუსეთი უკრაინაში შეიჭრა.

უნდა აღინიშნოს, რომ ქალაქების ჩაბნელებას სტრატეგიული მნიშვნელობაც აქვს. ქალაქის მოსახლეობა და ადგილობრივი მთავრობა ამ გზით ცდილობს, რომ ბომბების ჩამოგდებისგან თავი დაიცვას.

წინა ღამეებთან განათების შედარებამ 28 თებერვალს უჩვეულო აქტივობაც გამოავლინა. შემდეგ ფოტოზე სინათლის ახალ წყაროს ვხედავთ, რომელიც რუსული სამხედრო კოლონაა. სატელიტური გამოსახულება აჩვენებს, რომ რუსული სამხედრო კოლონა ქალაქ კიევზე თავდასასხმელად ემზადება.


აშშ-ის თავდაცვის ოფიციალური წარმომადგენლის შეფასებით, რუსეთის უკრაინაში შეჭრა ყველაზე დიდი კონვენციური სამხედრო თავდასხმაა მეორე მსოფლიო ომის შემდეგ. თანამედროვე ტექნოლოგიები, მათ შორის სატელიტი, ომის მსვლელობისას მნიშვნელოვან საინფორმაციო წყაროს წარმოადგენს.