ენერგოდარის მერის თქმით, ზაპოროჟეის ატომურ ელექტროსადგურზე დაჭრილები არიან. მისი თქმით, მდგომარეობა კრიტიკულია.

"გუშინ საღამოს, დაახლოებით 16:30-ზე, მტრის ბრონირებული ტექნიკის კოლონა შემოიჭრა ქალაქისკენ, წავიდნენ პირდაპირ ატომური ელექტროსადგურისკენ და დაიწყეს სროლა შენობებისა და ატომური ელექტროსადგურის მოწყობილობებისკენ, გაჩნდა ხანძარი, არიან დაჭრილები. ზუსტრი ინფორმაცია რაოდენობაზე არ მაქვს. რაც შეეხება მდგომარეობას, არიან მძიმედ დაჭრილები, არ გვაქვს საშუალება, რომ ისინი საავადმყოფოში გადავიყვანოთ", — თქვა მან.

უკრაინის საგანგებო სიტუაციების მართვის სამსახურის ინფორმაციით, დაბომბვის შედეგად ამ დრომდე იწვის ელექტროსადგურის სასწავლო-სატრენინგო კომპლექსი. ცეცხლმა ხუთსართულიანი შენობის სამი სართული მოიცვა. მათივე თქმით, ოკუპანტები არ აძლევენ ხანძრის ჩაქრობის საშუალებას.

რა ვიცით ამ ეტაპზე ატომური ელექტროსადგურის დაბომბვაზე

ზაპოროჟიეს ატომური ელექტროსადგური უდიდესია მსოფლიოში, სწორედ ის დაბომბეს რუსებმა ომის მეცხრე დილას, შედეგად ხანძარი გაჩნდა. ელექტროსადგურის კამერებიდან პირდაპირ ეთერში ჩანდა, რომ ტერიტორიაზე მიმდინარეობდა შეტაკებები და იყო აფეთქებები. უკრაინული სახელმწიფო უწყებების განცხადებით, სროლის გამო ადგილზე ვერ შედიოდნენ მაშველები და ხანძრის ჩაქრობა ვერ ხერხდებოდა.

ზაპოროჟიეს ატომური ელექტროსადგურის დირექტორმის მოვალეობის შემსრულებელმა, იგორ მურაშოვმა განაცხადა, რომ ბირთვული უსაფრთხოება ელექტროსადგურზე დარღვეულია. ელექტროსადგურის სპიკერის თქმით, რეალური ბირთვული საფრთხე არსებობს.

უკრაინის ენერგეტიკის მინისტრი კი ამბობს, რომ ზაპოროჟიეს ელექტროსადგურზე აფეთქება შეიძლება იყოს ყველაზე დიდი კატასტროფა კაცობრიობის ისტორიაში.

"ზაპოროჟიეს ატომურ ელექტროსადგურზე არის შვიდი ბირთვული დანადგარი, ექვსი ელექტროსადგური და საწყობი. მე-2 და მე-3 ბლოკები უსაფრთხოდ დაიხურა, მე-4 ბლოკი ახლა ფუნქციონირებს. პირველი ენერგობლოკი შეკეთების პროცესშია (მას დაესხნენ თავს). მე-5 და მე-6 ბლოკები რეზერვშია და უსაფრთხოდაა. მეოთხე ენერგობლოკის სიმძლავრე საკმარისია", — აცხადებს უკრაინის ბირთვული და რადიაციული უსაფრთხოების მთავარი სახელმწიფო ინსპექტორი.

ატომური ენერგიის საერთაშორისო სააგენტო უკრაინის მარეგულირებელზე დაყრდნობით აცხადებს, რომ ზაპოროჟიეს ატომურ ელექტროსადგურზე აფეთქების შემდეგ არ დაფიქსირებულა რადიაციული დონის ცვლილება.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში