ქართული ოცნების თავმჯდომარე, ირაკლი კობახიძე აცხადებს, რომ რუსეთისთვის სანქციების დაწესება საქართველოს მხრიდან მძიმე იქნება ქართველი ხალხისთვის და არა რუსეთისთვის. მისი თქმით, ამასთან დაკავშირებით პრემიერმინისტრის განცხადებას გუნდი სრულად იზიარებს.

"რა თქმა უნდა, ყველა აცნობიერებს იმას, რომ ეს სანქციები არ იქნება მტკინვეული რუსეთისთვის, მაგრამ იქნება ძალიან მძიმე ქართველი ხალხისთვის. ასეთ დროს, რა თქმა უნდა, ჩვენ გვმართებს ყველაფრის აწონ-დაწონვა და ამის მიხედვით გადაწყვეტილების მიღება, სწორედ ამას ეფუძვნებოდა ჩვენი გადაწყვეტილება სანქციებთან დაკავშირებით. საქართველოს არ აქვს რესურსი, რომ დღეს ისაუბროს სანქციებზე", — ამბობს ის.

გუშინ, 28 თებერვალს პრემიერმინისტრმა ირაკლი ღარიბაშვილმა განაცხადა, რომ რუსეთის მიმართ დასავლეთის დაწესებული სანქციები ეფექტური საშუალება არაა. მისი თქმით, რუსეთის სანქცირების შემთხვევაში, ფული, რომელიც საქართველოში შემოდის, "ხალხს მოაკლდება".

25 თებერვალს ღარიბაშვილმა განაცხადა, რომ საქართველო რუსეთს ფინანსურ და ეკონომიკურ სანქციებს არ დაუწესებს. მისი მტიცებით, ეს გადაწყვეტილება ქვეყნის ეროვნულ ინტერესებს ეფუძნება.

ამავე დღეს პრემიერმინისტრმა თქვა, რომ არავითარ საჭიროებას არ ხედავს უკრაინის საკითხზე პარლამენტში რიგგარეშე სხდომის მოწვევის და მას თავისი საქმე აქვს, პარლამენტსაც თავისი საქმე აქვს, ომი კი უკრაინაში მიმდინარეობს.