ლელოს ერთ-ერთმა ლიდერმა, სალომე სამადაშვილმა ქართული ოცნების დეპუტატებს პარლამენტში სიტყვით გამოსვლისას მიმართა და აღნიშნა, რომ საკუთარ ღირსებაზე უარის თქმაა უკრაინის რეზოლუცია. მისივე განცხადებით, საკუთარი ღირსების უარყოფაა ისიც, რომ დღემდე მმართველი გუნდიდან უკრაინაში არავინ ჩასულა.

"სიბრაზის ცრემლებით ხმაგაბზარული და მათზე დაკისრებული სიმძიმით დაღლილი, მაგრამ სრულიად შეუვალი უკრაინელი პოლიტიკოსების მოსმენისას რთული იყო არ შეგრცხვენოდა საკუთარი ღირსებააყრილი ხელისუფლების. ჩვენი ქვეყნისთვის, დიახ, ღირსების აღდგენას შევეცადეთ, როდესაც უკრაინელების ერთადერთ თხოვნას, ვთქვათ სიმართლე იმაზე, რაც უკრაინაში ხდება, ჩვენი სოლიდარობით ვუპასუხეთ.

დღეს აქ, საქართველოს პარლამენტში მე მსურს, რომ თქვენ, უმრავლესობის წარმომადგენლებს გკითხოთ, რატომ აიძულებთ ქართველ ხალხს, უარი თქვათ ღირსებაზე და რატომ აიძულებთ ჩვენს ქვეყანას ჩაიდინოს პოლიტიკური თვითმკვლელობა? დიახ, საკუთარ ქვეყანაზე ღირსების უარის თქმაა ის რეზოლუცია, რომელიც თქვენ დაამტკიცეთ უკრაინაზე და საკუთარი ღირსების უარყოფა არის ის, რომ დღემდე არცერთი თქვენგანი უკრაინაში არ ჩასულა და უკრაინაში არ ჩასულა არცერთი ოფიციალური დელეგაცია საქართველოს ხელისუფლების წარმომადგენლობით", — აღნიშნა მან.

უკრაინის საზღვრებთან რუსული ჯარების მობილიზებისა და რუსული აგრესიის ზრდის ფონზე, მმართველი პარტიის წევრები აცხადებენ, რომ კიევში ვიზიტს არ აპირებენ. ამაზე ისაუბრა, როგორც ქართული ოცნების თავმჯდომარემ, ირაკლი კობახიძემ, ასევე, დეპუტატმა, მამუკა მდინარაძემ. პირველ თებერვალს კი საქართველოს პარლამენტმა მიიღო უკრაინის მხარდამჭერი რეზოლუცია, სადაც რუსეთი ნახსენები არ არის.

ერთიანი ნაციონალური მოძრაობის, ლელოსა და დროას წარმომადგენლები კიევში ჩავიდნენ და შექმნილი ვითარებიდან გამომდინარე უკრაინის მხარდაჭერა დააფიქსირეს. კიევში შეხვედრებს მართავენ მსოფლიოს ლიდერები, ისმის რუსული აგრესიის კრიტიკა და უკრაინისადმი მხარდაჭერის გამოხატვა, თუმცა საქართველოს მთავრობის წარმომადგენლები უკრაინაში ჯერ კიდევ არ ჩასულან.