The guardian-ის ახალი კვლევის თანახმად, ევროპაში გამოკითხულ 60%-ზე მეტი ფიქრობს, რომ თუ რუსეთი შეიჭრება, NATO-მ უკრაინა უნდა დაიცვას. ამასთან, გამოკითხულთა უმრავლესობის აზრით, რუსეთი უკრაინაში 2022 წელს შეიჭრება.

"ევროკავშირის ქვეყნებს ხატავდნენ, როგორც დაყოფილს, სუსტსა და უყურადღებოს, თუმცა ევროპის მოქალაქეები ერთიანი არიან: ისინი თანხმდებიან, რომ ვლადიმერ პუტინმა, შესაძლოა, სამხედრო მოქმედებები განაგრძოს და ევროპა, NATO-ს პარტნიორებთან ერთად, უკრაინას უნდა დაეხმაროს", — განაცხადა საგარეო ურთიერთობათა ევროპული საბჭოს დირექტორმა, მარკ ლეონარდმა.

ავტორების თქმით, კვლევა ხაზს უსვამს, რომ სტერეოტიპი, რომლის მიხედვითაც ევროპელებს ომი წარმოუდგნელად მიაჩნიათ, სიმართლეს არ შეესაბამება. კვლევა იანვარში ევროპის შვიდ ქვეყანაში ჩატარდა. ფინეთში 44%-ს მიაჩნია, რომ რუსეთი უკრაინას წელს დაესხმება თავს, საფრანგეთსა და იტალიაში ამას გამოკითხულთა 51-51%-იზიარებს, გერმანიაში — 52%, შვედეთში — 55%, რუმინეთში — 64%, ხოლო პოლონეთში 73%.

26 იანვარს რუსეთმა ბელარუსში სამხედრო ძალები განათავსა, რითიც უკრაინის ჩრდილოეთით შეიქმნა ახალი სავარაუდო ფრონტი თავდასხმისთვის. ამის ფონზე რუსეთი ამტკიცებს, რომ უკრაინაში შეჭრას არ გეგმავს, ამავდროულად კი დასავლეთი მკაცრი ეკონომიკური სანქციებით იმუქრება. ბოლო ინფორმაციით, რუსეთს უკრაინის საზღვრებთან 100 ათასამდე სამხედრო ჰყავს მობილიზებული.

3 თებერვალს ამერიკის შეერთებულმა შტატებმა განაცხადა, რომ რუსეთი შეჭრის საბაბად ყალბი ვიდეოს დამზადებას გეგმავდა, სადაც ნაჩვენები იქნებოდა უკრაინელების თავდასხმა რუსეთის ტერიტორიაზე ან რუს სეპარატისტებზე. აშშ-ს ცნობით, ერთ-ერთი ვარიანტი, რომელსაც კრემლი განიხილავს, არის თავდასხმის ინსცენირება და გადაღება, მათ შორის, აფეთქებებისა და მსხვერპლის გამოსახულებები.

ამასთან, როგორც ევროკომისიის ხელმძღვანელმა, ურსულა ფონ დერ ლაიენმა 4 თებერვალს თქვა, თუ რუსეთი უკრაინის მიმართ აგრესიას გააგრძელებს, ევროკავშირს რუსეთის წინააღმდეგ სანქციები აქვს მზად.

გაიგე მეტი: