სირცხვილიამ პრემიერმინისტრ ირაკლი ღარიბაშვილს ქუთაისი-კიევის ბილეთი უყიდა და სთავაზობს, უკრაინაში ვიზიტისთვის ამ რეისით ისარგებლოს. სამოქალაქო მოძრაობა "დარწმუნებულია", რომ მეგობარ ქვეყანაში ჩასვლაზე თავშეკავების "არაერთი სერიოზული მიზეზი არსებობს", ამიტომ პრემიერის ფრენა ორგანიზაციული სახსრებით დააფინანსეს.

ბილეთი მხოლოდ ერთი მიმართულებითაა და თარიღი ღარიბაშვილის იზოლაციის ვადებს ითვალისწინებს. საჭიროების შემთხვევაში, ორგანიზაცია მზად არის პრემიერს პირადად გადასცეს ბილეთი.

"სამოქალაქო მოძრაობა სირცხვილია დარწმუნებულია, რომ თქვენ მიერ უკრაინაში ვიზიტისგან თავშეკავების არაერთი სერიოზული მიზეზი არსებობს, მაგალითად: საქართველოში არსებული ეკონომიკური სიდუხჭირე, მთავრობის ხარჯების შემცირების პოლიტიკა 2022 წლისთვის და რაც მთავარია, თქვენი ჯანმრთელობის მდგომარეობა კოვიდინფიცირების ფონზე.

ვითვალისწინებთ რა ზემოთ ჩამოთვლილ გარემოებებს, სამოქალაქო მოძრაობა სირცხვილიამ მიიღო გადაწყვეტილება, ორგანიზაციული სახსრებით დააფინანსოს თქვენი მგზავრობა ქუთაისი-კიევის მიმართულებით. თქვენი 5-დღიანი იზოლაციისა და შემდგომი კოვიდ-რეაბილიტაციის ვადების გათვალისწინებით, ქუთაისი-კიევის მიმართულებით შესყიდული იქნა 2022 წლის 10 თებერვლის ავიაბილეთი", — წერს სირცხვილია.

სირცხვილია პრემიერმინისტრს ახსენებ იმ საჭირო დოკუმენტებს, რაც გამგზავრებისათვის დასჭირდება და იქვე ამბობს, რომ ბილეთის ელექტრონული ვერსია უკვე გაუგზავნეს.

უკრაინის საზღვრებთან სიტუაცია უფრო და უფრო იძაბება. 26 იანვარს რუსეთმა ბელარუსში სამხედრო ძალები განათავსა, რითიც უკრაინის ჩრდილოეთით შეიქმნა ახალი სავარაუდო ფრონტი თავდასხმისთვის. რუსეთი კი ამტკიცებს, რომ უკრაინაში შეჭრას არ გეგმავს, ამავდროულად კი დასავლეთი მკაცრი ეკონომიკური სანქციებით იმუქრება. ბოლო ინფორმაციით, რუსეთს უკრაინის საზღვრებთან 100 ათასამდე სამხედრო ჰყავს მობილიზებული.

ამის ფონზე, დღეს, პირველ თებერვალს საქართველოს პარლამენტმა მიიღო უკრაინის მხარდამჭერი რეზოლუცია, სადაც რუსეთი ნახსენები არ არის.

უკრაინის რადას დეპუტატის, სალომია ბობროვსკას თქმით, უკრაინა საქართველოს მთავრობისა და პარლამენტისგან მხარდაჭერას ელოდა. მისი თქმით, მათ იციან, რომ საქართველო მათ გვერდით დგას, თუმცა მათ უფრო კონკრეტული და მკაფიო მხარდაჭერის მოლოდინი ჰქონდათ.

რადას კიდევ ერთი დეპუტატის, ივანა კლიმპუშ-ცინცაძის კი აცხადებს, რომ მათ დიდი სურვილი აქვთ და ელოდებიან, რომ უკრაინაში მალე საქართველოს ოფიციალური პირებიც ჩავლენ. დეპუტატი აღნიშნავს ოპოზიციის მხარდაჭერას და ამბობს, რომ თუ უკრაინა ვერ გადარჩება, ვერ გადარჩება ვერც საქართველო.

ამ დროისთვის ერთიანი ნაციონალური მოძრაობის, ლელოსა და დროას წარმომადგენლები კიევში იმყოფებიან, რათა შექმნილი ვითარებიდან გამომდინარე უკრაინის მიმართ მხარდაჭერა გამოხატონ.