პარლამენტმა მიიღო უკრაინის მხარდამჭერი რეზოლუცია, რომელშიც რუსეთი ნახსენები არ არის. მომხრე 74 დეპუტატი იყო, წინააღმდეგი — არცერთი.

პლენარულ სხდომაზე არაერთმა ოპოზიციონერმა დეპუტატმა მოუწოდა მმართველ გუნდს, რომ ეხსენებინათ რეზოლუციაში რუსეთი.

"საქართველოში არიან ადამიანები, რომლებიც იცავენ ქვეყნის ინტერესებს ყველაფრის მიუხედავად. დღეს დარბაზში ვინც ვართ, მგონია ყველას გულწრფელად გვჯერა, რომ დიახ, რუსეთის ფედერაცია არის ძალა, რომელიც ხელახალი აგრესიის რისკს ქმნის უკრაინაში. არ მინდა ვიფიქრო, რომ ჩემი კოლეგები ქართული ოცნებიდან ამ აზრს არ იზიარებენ.

თუმცა, კიდევ ერთხელ მიუხედავად ამ პოლიტიკური უაზრო თამაშებისა გთხოვდით, რომ ერთად მოვინდომოთ, დავდგეთ იმაზე მაღლა, ვიდრე ახლა ამას ვახერხებთ და ზეპარტიულ საკითხებზე შეთანხმება შევძლოთ", — განაცხადა თეონა აქუბარდიამ.

რეზოლუციის პროექტის ერთ-ერთმა ავტორმა, გიორგი ხელაშვილმა თქვა, რომ მთავარი ამოცანა დაძაბულობის შემცირება და კატასტროფის თავიდან არიდებაა.

"დღეს ჩვენი მთავარი ამოცანა, როგორც რეზოლუციიდანაც ჩანს, არის დაძაბულობის შემცირება, რომ როგორმე ავირიდოთ თავიდან კატასტროფა. ეს განსხვავება თქვენთვის შეიძლება უმნიშვნელო იყოს, მაგრამ ეს არის ძალიან მნიშვნელოვანი განსხვავება 2014 წლის რეზოლუციებსა და დღევანდელ რეზოლუციას შორის", — თქვა მან.

რეზოლუციის პროექტის ავტორები არიან საქართველოს პარლამენტის წევრები — გიორგი ხელაშვილი, მაკა ბოჭორიშვილი, ლევან ქარუმიძე, გივი მიქანაძე და თამარ ტალიაშვილი.

როგორც განმარტებით ბარათშია აღნიშნული, რეზოლუციით პარლამენტი აღიარებს საერთაშორისო ურთიერთობებში სახელმწიფოთა საზღვრების ურღვევობის, ტერიტორიული მთლიანობის და სუვერენიტეტის პრინციპების უდიდეს მნიშვნელობას, ხაზს უსვამს ამ პრინციპების დაცვის აუცილებლობას საერთაშორისო მშვიდობისა და უსაფრთხოების შენარჩუნებისთვის.

რეზოლუციაში პარლამენტი გამოთქვამს შეშფოთებას უკრაინაში შესაძლო სამხედრო ესკალაციის გამო, რამაც შესაძლოა საფრთხე შეუქმნას არა მხოლოდ უკრაინის, არამედ რეგიონულ მშვიდობასა და უსაფრთხოებას.

"საქართველოს პარლამენტი აცხადებს, რომ ჩრდილოატლანტიკურ ალიანსში წევრობის საკითხი წარმოადგენს სახელმწიფოს სუვერენულ უფლებას და მიუღებლად აცხადებს მსგავსი არჩევანის გაკეთებას სახელმწიფოს სამხედრო-პოლიტიკური ინსტრუმენტებით ზემოქმედებისთვის ყოველგვარ მცდელობას. რეზოლუციით საქართველოს პარლამენტი მოუწოდებს საქართველოს მთავრობას გამოიყენოს მის ხელთ არსებული დიპლომატიური ინსტრუმენტები და აწარმოოს სტრატეგიულ პარტნიორებთან მჭიდრო კოორდინაცია უკრაინაში ომის არდასაშვებად", — ვკითხულობთ დოკუმენტში.

უკრაინის მხარდამჭერი რეზოლუციის შემუშავების ინიციატივა ოპოზიციური ფრაქციების ლიდერებს ეკუთვნით. 24 იანვარს გამართულ ბრიფინგზე მათ მმართველ პარტიას ერთიანი ტექსტის შემუშავება შესთავაზეს, თუმცა შეთანხმება ვერ მოახერხეს.

რეფორმების ფრაქციის წევრის, ხათუნა სამნიძის ინფორმაციით, ქართულმა ოცნებამ მათ საკუთარი ვერსია შესთავაზა და განხილვის შემდეგ ისინი პრინციპულ საკითხებზე შეთანხმდნენ. თუმცა, მისივე თქმით, შესვენების დროს "ოცნების" დეპუტატებმა გადაწყვიტეს ტექსტის თავდაპირველი ვერსია დაებრუნებინათ, რის გამოც ოპოზიციამ თანაავტორობაზე უარი თქვა.

კერძოდ, იმ ვერსიაში, რომელიც მმართველმა პარტიამ ოპოზიციურ პარტიებს შესთავაზა, რუსეთი ნახსენები არ არის. მამუკა მდინარაძე აცხადებს, რომ რეზოლუცია, რომელსაც საქართველოს პარლამენტი მიიღებს, დაცლილია პოპულისტური თუ პროვოკაციული რიტორიკისგან.