საქართვლოს პრეზიდენტი, გიორგი მარგველაშვილი აცხადებს, რომ მისთვის გაუგებარია ქართული ოცნების წევრების წარმომადგენლების განცხადებები, რომლებიც, პრეზიდენტის თქმით, ტერორიზმის ხელშეწყობაში, ან საკონსტიტუციო კომისიის კონტროლში ადანაშაულებენ. ამის შესახებ მარგველაშვილმა ილიაუნის სტუდენტებთან შეხვედრისას განაცხადა:

"საკუთარი თავის შესახებ ძალან ბევრი გავიგე ბოლო რამდენიმე თვეში. მაგალითად გავიგე, რომ ტერორიზმს ვუწყობ ხელს და სახლემწიფოს ვანგრევ, რადგან მოსმენების კანონზე ჩემი აზრი კონსტიტუციურად გამოვთქვი. გავიგე, რომ ტერორიზმის მხარდამჭერი ვარ იმიტომ, რომ ვთქვი, რომ დანიშნოს თავმჯდომარე პრემიერ-მინისტრმა. ცოტა ხნის წინ გავიგე, რომ თურმე ვაკონტროლებ სტრასბურგს და კიდე ერთი დღის წინ გავიგე, რომ თურმე საკონსტიტუციო კომისიასაც ვაკონტროლებ."

პრეზიდენტის თქმით, მან პოლიტიკური განცხადება გააკეთა რუსთავი 2-თან დაკავშირებით, თუმცა ვერ ხვდება ვინ აწვდის "სანდო ინფორმაციას" ზოგიერთ თანამდებობის პირს.

"შემიძლია ვაღიარო, რომ ვაკონტროლებ სტარსბურგის სასამართლოს, აგრეთვე, ნიუ-იორკის ბირჟას და კიდევ გადაცემას, ვის უნდა 20 ათასი," - ამბობს მარგველაშვილი.

პრეზიდენტის განცხადებით, თუ ძალიან მნიშნვნელოვანია, რომ საუბარი შედგეს პოლიტიკოსებს შორის:

"მნიშვნელოვანია, რომ დღეს აქ იყვნენ ის ადამიანები, რომლებსაც მე ვეპატიჟები მუდმივად. მე როდესაც ივყავი პარლამენტში მივმართე როგორც საპარლამენტო უმრავლესობას ასევე ოპოზიციურ პარტიებს, რომ მოდით ჩემთან ერთად, მივიდეთ საზოგადოებასთან და მათთან ერთად ვისაუბროთ. საზოგადოება არ არის სხვადასხვა კაბინეტებში ჩაკეტილი ადამიანები. საზოგადოება არის საზოგადოებრივ სივრცეში ერთმანეთის ენერგიისა და აზრების გამზიარებელი ადამიანები."

მარგველაშვილმა უარყო მოსაზრება, თითქოს ის საარჩევნო კამპანიას ატარებს. მისი თქმით, ის არ არის ისეთი გამოუცდელი პოლიტიკურად, რომ ორი წლით ადრე დაიწყოს კამპანია:

"ამიტომ სრულიად გულწრფელად გეუბნებით არ ვატარებ საარჩევნო კამპანიას."

პარლამენტის თავმჯდომარემ, ირაკლი კობახიძემ პრეზიდენტი დაადანაშაულა, თითქოს ის არასამთავრობო ორგანიზაციებთან და ცალკეულ პოლიტიკურ პარტიებთან კონსულტაციების გზით მათ საკონსტიტუციო კომისიის დატოვებისკენ მოუწოდებდა.