დევნილთა, ეკომიგრანტთა და საარსებო წყაროებით უზრუნველყოფის სააგენტო სანატორიუმ ქართლის შენობაში მცხოვრებ დევნილებს ქირით უზრუნველყოფას მხოლოდ ერთი წლით ჰპირდება. უწყებაში განმარტავენ, რომ ამ დროის განმავლობაში დევნილები უპირობოდ მიიღებენ ახალ საცხოვრებელ ფართებს.

აღსანიშნავია, რომ დევნილები აქამდე უარს ამბობდნენ ქირით გადასვლაზე. მათ მოლოდინი აქვთ, რომ ამ პირობაზე დათანხმების შემთხვევაში, სახელმწიფომ შესაძლოა შეწყვიტოს მათთვის ქირის გადახდა და ამის გაკეთება თავად მოუწიოთ.

უწყება გრძელვადიანი განსახლებისთვის სანატორიუმ ქართლის მცხოვრებლებს ორ გზას სთავაზობს:

  • თავად მოიძიონ ბინა თბილისში — ამ შემთხვევაში სააგენტო ერთ კვადრატულ მეტრში $550 გადაიხდის;
  • დაელოდონ მათთვის შეძენილი ბინების მშენებლობის დასრულებას. ამ შემთხვევაში სააგენტო, მათ ქირის თანხით უზრუნველყოფას სთავაზობს.

"სურვილის შემთხვევაში, დევნილ ოჯახებს შესაძლებლობა ეძლევათ, ექსპლუატაციაში მიუღებელი ბინებიც წარმოადგინონ და სააგენტო მათ ამ საცხოვრებელ ფართს შეუძენს;

მიმდინარე მენაშენეთა კონკურსის ფარგლებში, დევნილთა, ეკომიგრანტთა და საარსებო წყაროებით უზრუნველყოფის სააგენტო აქტიურად თანამშრომლობს მენაშენეთა ასოციაციასთან, სამშენებლო კომპანიებთან და ამ პროცესის შესახებ, ყოველკვირეული ანგარიშის სახით, წერილობით ეცნობება დევნილ მოსახლეობას", — ვკითხულობთ სააგენტოს განცხადებაში.

უწყებაში აცხადებენ, რომ სანატორიუმ ქართლში მცხოვრები დევნილებისთვის ახალი კორპუსების მშენებლობისთვის მიწებს თბილისში, რუსთავსა და ზუგდიდში ეძებენ. მათივე განცხადებით, ახალი კორპუსისთვის ადგილი უკვე შერჩეულია ქუთაისში.

16 იანვარს, სანატორიუმ ქართლის შენობასთან დევნილი გარდაიცვალა. ადგილობრივების თქმით, ის სახურავიდან გადმოხტა და თვითმკვლელობის მიზეზი მათი მოთხოვნების შეუსრულებლობაა. სანატორიუმის ყოფილ შენობაში მცხოვრები დევნილები საცხოვრებელ პირობებს აპროტესტებენ. მათი განცხადებით, შენობა ავარიულია და საცხოვრებლად საშიში. რამდენიმე კვირაა პასუხისმგებელ პირებთან, მათ შორის ჯანდაცვის მინისტრთან შეხვედრას ითხოვენ. საქმეზე გამოძიება თვითმკვლელობამდე მიყვანის მუხლით დაიწყო.

17 იანვარს ჯანდაცვის მინისტრმა, ზურაბ აზარაშვილმა განაცხადა, რომ სანატორიუმ ქართლში მომხდარი ფაქტი "უბედური შემთხვევაა" და ის დევნილთა პრობლემებს არ უნდა დაუკავშირონ. მინისტრის განცხადებას გამოეხმაურნენ სანატორიუმ ქართლის შენობაში მცხოვრები დევნილები. მათი განცხადებით "ამ ქვეყანაში ადამიანებს კლავთ გულგრილობა, უიმედობა და სასოწარკვეთა".