ექსპრეზიდენტი მიხეილ სააკაშვილის მიერ სახელმწიფო საზღვრის უკანონო კვეთის საქმეზე დაკავებულ ელგუჯა ცომაიას, შალვა წოწორიას, ზურაბ წოწორიასა და გიორგი ნარიმანიძეს აღკვეთის ღონისძიება პატიმრობა 5 000-ლარიანი გირაოთი შეეცვალათ.

"იმის გათვალისწინებით, რომ ბრალდების მხარის მტკიცებულებები დაცვის მხარემ გახადა უდაოდ, შესაბამისად ერთ-ერთი მნიშვნელოვანი გარემოება ეს არის ახალი გარემოება, გარდა ამისა, ბრალდებულებმა აღიარეს ჩადენილი დანაშაულებები. აქედან გამომდინარე, დაცვის მხარის შუამდგომლობის საფუძველზე, ბრალდების მხარეც დაეთანხმა და მიაჩნია, რომ ნაკლებად მკაცრი აღკვეთის ღონისძიება უზრუნველყოფს მათ სათანადო ქცევას და მოსამართლემ შეუცვალა გირაო 5 000 ლარის ოდენობით", — განაცხადა საქმის პროკურორმა სასამართლოს სხდომის შემდეგ.

პროკურორის განცხადებით, მოწმეების დაკითხვა, წერილობითი და ვიდეო მტკიცებულებების გამოკვლევა აღარ მოხდება, ვინაიდან დაცვის მხარემ უდაო გახადა ყველა მტკიცებულება.

ასევე, ლევან ვეფხვაძის თქმით, მომდევნო სასამართლო პროცესზე ბრალდების მხარეცა და დაცვის მხარეც წარსდგება დასკვნითი სიტყვით.

"დაველოდებით მოსამართლის განაჩენს. მიგვაჩნია, რომ საქმეზე უნდა დადგეს გამამტყუნებელი განაჩენი ოთხივე ბრალდებულის მიმართ", — ამბობს პროკურორი.

მისივე კომენტარიდან ირკვევა, რომ ამ ეტაპზე საპროცესო შეთანხმებაზე საუბარი არ არის და არც ბრალდების მხარეს მიუმართავს ამაზე, თუმცა გამორიცხული არაფერი არ არის.