რუსეთმა კოლექტიური უსაფრთხოების ორგანიზაციის (ОДКБ) დანაყოფების ყახზახეთიდან გაყვანა დაასრულა. ამის შესახებ ინფორმაციას რადიო თავისუფლება ავრცელებს.

მედიის ცნობით, რუსეთის დანაყოფებს ყაზახეთში ანდრეი სერდიუკოვი ხელმძღვანელობდა — ბოლო სამხედროებმა ქვეყანა 19 იანვარს დატოვეს.

კოლექტიური უსაფრთხოების ორგანიზაციის დანაყოფები "სახელმწიფო ინსტიტუტების დასაცავად და ძალოვანი სტრუქტურების დახმარებლად" ყაზახეთში 6 იანვრიდან გაგზავნეს. ქვეყნის ტერიტორიაზე შევიდნენ რუსული ჯარებიც, მათ შორის, BBC-ის ინფორმაციით, რუსეთმა ყაზახეთში 45-ე საჰაერო სადესანტო სპეცდანიშნულების ბრიგადა გაგზავნა, რომელიც 2008 წელს რუსეთ-საქართველოს ომში მონაწილეობდა. სამშვიდობოების ეტაპობრივი გაყვანა 13 იანვარს დაიწყო.

ქვეყანაში დაძაბულობა საწვავის ფასის ზრდის გამო 4 იანვარს მასობრივი აქციებით დაიწყო. მას შემდეგ, ყაზახეთის მთავრობა გადადგა, თუმცა დაპირისპირება არ შეწყვეტილა — მოქალაქეები პრეზიდენტის გადადგომას ითხოვდნენ.

დემონსტრანტებმა აიღეს ალტანის აეროპორტი და ჩამოაგდეს ნურსულთან ნაზარბაევის ძეგლი. მოგვიანებით, აეროპორტზე კონტროლი სამთავრობო ძალებმა აიღო. მთელი ქვეყნის მასშტაბით გათიშული იყო, როგორც მობილური, ასევე ხაზის ინტერნეტი და დაბლოკილია რამდენიმე აპლიკაცია.

მოქმედმა პრეზიდენტმა, ყასიმ-ჟომარტ ტოყაევმა დემონსტრანტებს ხულიგნები უწოდა, ძალადობასა და მაღაზიების ძარცვაში დაადანაშაულა. 7 იანვარს ყაზახეთის პრეზიდენტმა, ყასიმ-ჟომარტ ტოყაევმა განაცხადა, რომ ამ ეტაპზე ქვეყანაში "ანტიტერორისტული" ოპერაცია მიმდინარეობს, რომელიც "ბოევიკების სრულ განადგურებამდე" გაგრძელდება. მისივე თქმით, სამართალდამცავებს და არმიას მისცა ბრძანება, რომ ცეცხლი გაფრთხილების გარეშე გახსნან.