პრემიერმინისტრ ირაკლი ღარიბაშვილისთვის ვებგვერდი შექმნეს —garibashvili.ge. ინფორმაცია ამის შესახებ დღეს,12 იანვარს მთავრობის სტრატკომის Facebook გვერდზე გამოქვეყნდა. On.ge დეტალებზე მთავრობის პრესსამსახურს დაუკავშირდა, სადაც გვითხრეს, რომ ვებგვერდის შექმნაში "არაფერი დახარჯულა".

საიტზე მითითებულია, რომ ის 2021 წელს შეიქმნა. ვებგვერდზე განთავსებული ნიშნულების მიხედვით, სიახლეების გაცნობა ქართულად, ინგლისურად, ოსურად და აფხაზურად შეგეძლებათ.

ფოტო: სქრინი/garibashvili.ge

ვებგვერდს 4 მთავარი განყოფილება აქვს — შესახებ, სიახლეები, 2030 და გალერეა. პირველ განყოფილებაში პრემიერმინისტრის განათლების, სამუშაო გამოცდილებისა და ოჯახური მდგომარეობის შესახებ მიიღებთ ინფორმაციას. აქვე მითითებული, რომ ირაკლი ღარიბაშვილი ფლობს 4 უცხო ენას — ქართულს, ინგლისურს, ფრანგულსა და რუსულს.

2030-ის განყოფილებაში ყველა სამინისტროს 10-წლიანი გეგმაა მოცემული, თუმცა ამ ეტაპზე მხოლოდ ქართულად და ინგლისურადაა ხელმისაწვდომი.

ფოტო: კადრები ვებგვერდიდან/garibashvili.ge

სიახლეებში გაერთიანებულია პრემიერმინისტრის განცხადებები, პრესრელიზები, მთავრობის სხდომები და სხვა მნიშვნელოვანი ამბები. საიტზე განთავსებულ სულ პირველ სიახლედ მისი პრემიერმინისტრად დანიშვნა იძებნება სათაურით — "პარლამენტმა ირაკლი ღარიბაშვილის მთავრობას ნდობა გამოუცხადა". ფოტო და ვიდეო გალერეაშია პატრიარქთან შეხვედრის კადრები, მთავრობისა და უწყებათაშორისი საბჭოს სხდომები, ასევე, ფოტოებია საერთაშორისო შეხვედრებიდან.

გარდა ამისა, ოფიციალური ვებგვერდიდან შეგიძლიათ პრემიერმინისტრს წერილი გაუგზავნოთ.

ფოტო: კადრი ვებგვერდიდან/garibashvili.ge

საიტზე მითითებულ YouTube-ზე გადასვლა შეფერხებული იყო, ახლა კი მომხმარებლის ნაწილისთვის ეს შესაძლებელია, ნაწილისთვის ისევ არა. ვებგვერდზე დატანილია ღარიბაშვილის Facebook-ისა და Twitter-ის ბმულებიც.

ფოტო: სქრინი/Facebook

მთავრობის სტრატკომზე გამოქვეყნებული პოსტი კი, რომელიც საზოგადოებას ღარიბაშვილის საიტზე აწვდის ინფორმაციას, მთავრობას დასპონსორებული აქვს, რათა მეტმა ადამიანმა ნახოს.

Facebook Ad Library-ის მონაცემების მიხედვით, ამ პოსტის დასპონსორებისთვის მთავრობამ 100 დოლარი დახარჯა და 15-20 ათას მნახველზეა გათვლილი.

ფოტო: კადრი ვებგვერდიდან/Facebook Ad Library