თბილისში რეგისტრირებული სოციალურად დაუცველ პენსიონერებს მედიკამენტების 500-ლარიანი ვაუჩერებით სარგებლობის შესაძლებლობა დღეიდან ექნებათ. ამის შესახებ დედაქალაქის მერმა, კახა კალაძემ თბილისის მთავრობის სხდომის დაწყებამდე განაცხადა. მისი განმარტებით, პროგრამით სარგებლობა შეეძლებათ საპენსიო ასაკის იმ პირებს, ვისი ოჯახის სოციალური სარეიტინგო ქულა 200 ათასზე ნაკლებია.

კალაძის განცხადებით, პროგრამა ყოველწლიურად იმუშავებს — ანუ, ბენეფიციარებს ყოველი წლის დასაწყისში ვაუჩერის თანხა 500 ლარამდე ავტომატურად შეევსებათ. დეტალური ინფორმაციის გასაცნობად მათ დღეიდან ვაუჩერებთან ერთად საიფორმაციო ბროშურებიც დაურიგდებათ, თუმცა, კალაძე განმარტავს იმასაც, რომ ვაუჩერის მისაღებად მერიაში ან რაიონის გამგეოაბში მისვლა სავალდებულო არაა და ყველა, ვინც შესაბამის კრიტერიუმებს აკმაყოფილებს, ავტომატურად ჩაერთვება პროგრამაში.

"ვაუჩერის გამოსაყენებლად პროგრამის ბენეფიციარი ან მისი წარმომადგენელი საჭირო მედიკამენტების განსაზღვრის მიზნით მიმართავს ექიმს. ექიმი პაციენტის ჯანმრთელობის მდგომარეობის შესახებ ცნობას, რომელშიც მითითებული იქნება საჭირო მედიკამენტების ჩამონათვალი და რაოდენობა, განათავსებს პროგრამის ელექტრონულ მოდულში. ამის შესახებ ბენეფიციარი ან მისი წარმომადგენელი, მის მიერ მითითებულ ტელეფონის ნომერზე თბილისის მერიისგან SMS შეტყობინების საშუალებით სპეციალურ კოდს მიიღებს.

მიღებული კოდით და პირადობის დამადასტურებელი მოწმობით, მედიკამენტების ასაღებად მისთვის სასურველ აფთიაქს მიმართავს. იმ შემთხვევაში, თუ ბენეფიციარის მიერ შერჩეულ აფთიაქში სრულყოფილად არ არის ჯანმრთელობის ცნობაში მითითებული ყველა მედიკამენტი, მას შეეძლება დარჩენილი მედიკამენტი სხვა აფთიაქში ან მოგვიანებით, იმავე აფთიაქში აიღოს. ბენეფიციარმა ან მისმა წარმომადგენელმა აფთიაქიდან მედიკამენტები კოდის მიღებიდან არაუგვიანეს 30 დღეში უნდა გაიტანოს", — განმარტა კალაძემ.

მისივე თქმით, არ არის აუცილებელი ვაუჩერზე დარიცხული 500 ლარი ერთიანად გამოიყენოს ბენეფიციარმა — მისი დახარჯვა 1-წლის განმავლობაში, ლიმიტის ამოწურვამდეა შესაძლებელი.