ლეონარდო დიკაპრიო ერთ-ერთია იმ ვარსკვლავთაგან, რომლებიც კლიმატისა და გარემოს დაცვის საკითხებს დიდ ყურადღებას აქცევენ და პრობლემების მოსაგვარებლად არც საკუთარ გავლენასა და ფინანსებს იშურებენ. ცოტა ხნის წინ ლეონარდო დიკაპრიო კიუს სამეფო ბოტანიკური ბაღების მეცნიერებს დაეხმარა, რომლებიც კამერუნის ტროპიკულ ტყეში ხეების გაჩეხვას ეწინააღმდეგებოდნენ.

მეცნიერები და ბუნების დამცველები აღშფოთდნენ, როცა გაიგეს, რომ ტყეში ხეების გაჩეხვა ნებართვა გაიცა. უნიკალური ფლორითა და ფაუნით გამორჩეული ტროპიკული ტყის გადასარჩენად მეცნიერებმა სახელწმიფოს მიმართეს. საკითხმა ლეონარდო დიკაპრიოს ყურადღებაც მიიპყრო, რომელმაც მეცნიერებს მხარდაჭერა სოციალურ ქსელებში გამოუცხადა და კამპანიაში მეტი ადამიანი ჩართო.

საბოლოოდ, მეცნიერებმა და ბუნების დამცველებმა ლეონარდოს დახმარებით მიზანს მიაღწიეს:

"ვფიქრობთ, რომ მან გადამწყვეტი როლი ითამაში ებოს ტყეში ხეების გაჩეხვის აღკვეთაში", — აცხადებენ კიუს სამეფო ბოტანიკური ბაღების მეცნიერები.

მიზნის მიღწევის შემდეგ მადლიერმა მეცნიერებმა ტყეში აღმოჩენილ ახალ ხეს სახელი ლეონარდო დიკაპრიოს საპატივცემულოდ შეურჩიეს. Uvariopsis dicaprio — ასე ჰქვია ხეს, რომელიც მხოლოდ კამერუნში იზრდება და ლეონარდო დიკაპრიოსადმი მადლიერებას გამოხატავს.

Uvariopsis dicaprio მარადმწვანე მცენარეა, რომელსაც ყვითელი ყვავილები აქვს. ის ტყის მხოლოდ მცირე ნაწილში აღმოაჩინეს და მეცნიერები თვლიან, რომ გადაშენების საფრთხე ემუქრება.