რესპუბლიკური საავადმყოფოს კლინიკური დირექტორი, დევი ტაბიძე მოსახლეობას მიმართავს და სთხოვს, ჯანმრთელობის მდგომაროება ძალიან არ გამწვავდა, არ მიმართონ ჰოსპიტალს. ის ფიქრობს, რომ მნიშვნელოვანია ე.წ. საწოლფონდის არსებული რაოდენობა მძიმე პაციენტებისთვის გამოიყენებოდეს.

"ჩემი თხოვნა არის ასეთი მოსახლეობის მიმართ, რომ თუ ისინი ძალიან არ განიცდიან რაღაც ისეთი პრობლემის გამწვავებას, ნუ მიმართავენ ჰოსპიტალს. წინა გამოცდილებაც გვკარნახობს ამას, რომ მსუბუქი პაციენტით არ უნდა გადაიტვირთოს კლინიკა და ნამდვილად, ადამიანურად, პატივი ვცეთ იმ ხალხს, ვისაც ეს ესაჭიროება", — განაცხადა ტაბიძემ.

ჯანდაცვის ექსპერტი აცხადებს, რომ მიუხედავად გავრცელების მასშტაბისა, კორონავირუსის ახალი შტამი, ომიკრონი მსუბუქი ფორმებით მიმდინარეობს და მისი მართვა სახლში, ოჯახის ექიმის დისტანციური კონსულტაციით შესაძლებელია.

"შესაძლებელია, რომ კარგი მენეჯმენტის შემთხვევაში, ოჯახის ექიმებმა სწორად მართონ ბინებზე, სწორად იქნას ეს პაციენტები მართული კოვიდსასტუმროებში და არ მოხდეს რაოდენობის ზრდასთან ერთად ჰოსპიტლის გადატვირთვა. აი, ეს არის ერთ-ერთი მთავარი პრობლემა, რაც შეიძლება დადგეს, მაგრამ ამ ეტაპზე, პრინციპში, საწოლფონდი მზად არის, რომ თუნდაც ცოტა უფრო მაღალი ციფრებით არსებული შედეგები გააკონტროლოს და დააკმაყოფილოს მოსახლეობის მოთხოვნა", — განაცხადა ტაბიძემ.

მისი თქმით, ამ ეტაპზე რესპუბლიკური საავადმყოფო არ არის გადატვირთული და არც ომიკრონის შტამის მატარებელ პაციენტს მკურნალობენ. თუმცა აზუსტებს, რომ კლინიკას აქვს რესურსი და მზად არის იმისთვის, რომ "პირველი შემოტევა მიიღოს და შემდგომშიც მართავს".

დაავადებათა კონტროლისა და საზოგადოებრივი ჯანმრთელობის ეროვნული ცენტრის ინფორმაციით, ამ ეტაპზე საქართველოში ომიკრონის შტამის 335 ლაბორატორიულად დადასტურებული შემთხვევაა.

გაიგე მეტი: