პარლამენტმა ევროკავშირის, საერთაშორისო ორგანიზაციების და იმ ქვეყნების დროშის დაზიანებაზე, რომელთანაც საქართველოს დიპლომატიური ურთიერთობები აქვს 1 000-ლარიანი ჯარიმა დააწესა. კანონპროექტს მხარი 81-მა დეპუტატმა დაუჭირა.

კანონპროექტი მას შემდეგ მომზადდა, რაც 5-6 ივლისს ძალადობრივი კონტრაქციის მონაწილეებმა პარლამენტის წინ აღმართული ევროკავშირის დროშა ორჯერ ჩამოხსნეს და დახიეს.

მიუხედავად იმისა, რომ მაშინ ამ ფაქტს საზოგადოების დიდი ნაწილის აღშფოთება მოჰყვა, ხელისუფლებამ შესაბამისი რეაგირების არარსებობა საკანონმდებლო ხარვეზით ახსნა — ქართულ კანონმდებლობაში არ არსებობდა ჩანაწერი, როგორ უნდა დაისაჯოს უცხო ქვეყნის დროშის და სახელმწიფო სიმბოლოების შეურაცხყოფა.

ვანდალური აქტის შემდეგ, პარლამენტის ყოფილმა თავმჯდომარემ, კახა კუჭავამ ჩამოგლეჯილი ევროკავშირის დროშა ხელახლა დაკიდა და განაცხადა, რომ კანონპროექტს შეიმუშავებდნენ. მიუხედავად იმისა, რომ ოპოზიციის ნაწილი სიმბოლოების შეურაცხმყოფელთა დასჯის იდეას არ იზიარებს, საპარლამენტო ოპოზიციის მეორე ნაწილი პროცესში ჩაერთო და კანონპროქტის ინიციატორები, კუჭავასთან ერთად იყვნენ: ალექსანდრე ელისაშვილი, ფრიდონ ინჯია, ხათუნა სამნიძე და ბადრი ჯაფარიძე, უმრავლესობიდან კი, ნიკოლოზ სამხარაძე.