ქართული ოცნების თავმჯდომარე, ირაკლი კობახიძე აცხადებს, რომ მიხეილ სააკაშვილის მკურნალობა 2 კვირის წინ დასრულდა, რაზეც არსებობს ოფიციალური დასკვნა.

"მკურნალობა დასრულდა 2 კვირის წინ, რიფიდინგი დასრულდა, რაზეც არსებობს ოფიციალური დასკვნა.

ელენე ხოშტარია ნამდვილად შიმშილობდა და მას ჰქონდა უფრო რთული მდგომარეობა თავი დროზე, როცა დაასრულა შიმშილობა, ვიდრე მიხეილ სააკაშვილს. უკვე გასულია ლამის 1 თვე და ელენე ხოშტარია ხან ერთ აქციაზეა, ხან მეორეზე და არანაირი პრობლემა არ აქვს. როდესაც ადამიანი, რომელიც რეალურად არც შიმშილობდა, მერე ამბობს, რომ მას მთელი ცხოვრება გორის ჰოსპიტალში უნდა უმკურნალოს სახელმწიფომ, ეს არის აშკარა დისკრიმინაციული მიდგომა", — ამბობს კობახიძე.

გვიან ღამით სააკაშვილის ადვოკატებმა გაავრცელეს ინფორმაცია, რომ ექსპრეზიდენტი გორის ჰოსპიტლიდან რუსთავის მე-12 დაწესებულებაში გადაიყვანეს. ოფიციალური განცხადება პენიტენციურმა სამსახურმა ინფორმაციის გავრცელებიდან 9 საათის შემდეგ გაავრცელა და დაადასტურა, რომ სააკაშვილი რუსთავის ციხეშია.

გუშინ, 29 დეკემბერს მედიაში გავრცელდა ინფორმაცია, რომ სააკაშვილის მკურნალი ექიმის ჯანმრთელობის მდგომარეობა გაუარესდა. იმავე დღეს სახალხო დამცველის წარმომადგენელმა, საბა ბრაჭველმა თქვა, რომ სააკაშვილს, ამ ეტაპზე, ექიმი არ ჰყავს.

28 დეკემბერს გორის ჰოსპიტალში სააკაშვილის მკურნალმა ექიმმა, ნინო გოგორიშვილმა ექსპრეზიდენტის ადვოკატი, ნიკა გვარამია შეცდომაში შეყვანაში დაადანაშაულა. ნიკა გვარამიამ წაიკითხა ოქმი, სადაც, მისი თქმით, ექიმი, ნინო გოგორიშვილი საუბრობს, თუ რა მოხდა 27 დეკემბერს, როდესაც სააკაშვილს გადაყვანის შესახებ აცნობეს.