პრემიერმინისტრი ირაკლი ღარიბაშვილი ამტკიცებს, რომ ესმის სათამაშო ბიზნესის წარმომადგენელთა წუხილი აზარტული თამაშების რეგულირებასთან დაკავშირებით, თუმცა ინიციატივას ხალხზე ზრუნვის მოტივაციით ამართლებს.

"მე მოვისმინე სათამაშო ბიზნესის წარმომადგენლების წუხილი, შეშფოთება. მე მესმის. ჩვენ არ ვართ ბიზნესის წინააღმდეგი, მაგრამ ჩვენ ვფიქრობთ, პირველ რიგში, ხალხზე. მეგობრებო, ბოდიში მომითხოვია ყველასთან, მაგრამ მე, როგორც პრემიერმინისტრი, ვარ ვალდებული, რომ ჯერ ჩვენს ქვეყანაზე ვიფიქრო, ხალხზე ვიფიქრო და შემდეგ, რა თქმა უნდა, ა.შ.", — განაცხადა ღარიბაშვილმა.

მან მადლობა გადაუხადა დეპუტატებს, რომლებმაც აზარტული თამაშების რეგულაციის შესახებ კანონს მხარი დაუჭირეს.

"მე მინდა პარლამენტს და თითოეულ დეპუტატს მადლობა გადავუხადო, რომელმაც მხარი დაუჭირა ჩემს ინიციატივას, რომელიც აზარტულ თამაშებს არეგულირებს. ინიციატივა ბოლომდე მივიყვანეთ და ეს კანონი მივიღეთ", — განაცხადა ღარიბაშვილმა.

აზარტული თამაშების რეგულაციის შესახებ კანონპროექტი პარლამენტმა 22 დეკემბერს დაამტკიცა. კანონპროექტი ითვალისწინებს როგორც ონლაინ, ასევე ფიზიკურ სივრცეში სათამაშო ბიზნესის რეკლამირების აკრძალვას, ასევე, აზარტულ და მომგებიან თამაშებში მონაწილეობისთვის ასაკობრივი ზღვრის 25 წლამდე გაზრდას.

გაიგე მეტი: