ექსპრეზიდენტ მიხეილ სააკაშვილის განცხადებით, "წარმოდგენაც კი არ შეეძლო", როგორ რთულ მდგომარეობაში იყო საქართველოს სასამართლო სისტემა, სანამ თავად არ აღმოჩნდა პროცესებზე. ასე გამოეხმაურა სააკაშვილი გავრცელებულ ინფორმაციას ძმებ წულუკიძეების, ჭელიძეებისა და ელდარ ანთაძისთვის თავისუფლების აღკვეთის მისჯის შესახებ

"ჩემი სრული სოლიდარობა ძმებ წულუკიძეებს, ჭელიძეებს და ელდარ ანთაძეს უკანონო განაჩენის შემდეგ. ეს ხალხი დააპატიმრეს, რადგან მათ უარი თქვეს არჩევნების გაყალბებაში ჩართვაზე. ამ ადამიანებმა გამოიჩინეს პრინციპულობა და ღირსება არავის შეალახვინეს.

მე წარმოდგენაც კი არ შემეძლო, რამდენად მძიმე ფორმაში იყო საქართველოს სასამართლო სისტემა, სანამ ჩემს საქმეებთან დაკავშირებით არ აღმოვჩნდი პროცესებზე. საერთოდ მცდელობაც კი არ ჰქონია პროკურატურას რაიმე სერიოზული მტკიცებულება ან ჩვენება მოეგროვებინა მთელი ამ დროის განმავლობაში. ეს მართლმსაჯულების პაროდიაც კი აღარ არის, ეს ელემენტარული ადამიანობის დაცინვაა!", — დაწერა სააკაშვილმა Facebook-ზე.

დღეს ენმ-ის ერთ-ერთმა ლიდერმა, ხატია დეკანოიძემ გაავრცელა ინფორმაცია, ფირუზ და რეზო წულუკიძეებს, ასევე, თორნიკე, თამაზ, გელა და ირაკლი ჭელიძეებს 4 წელი, ხოლო ელდარ ანთაძეს სასამართლომ 5 წელი მიუსაჯა.

ჭელიძეები, წულუკიძეები და ანთაძე გუმათჰესის დასახლებაში, ნამახვანჰესის მშენებლობის საწინააღმდეგო აქციაზე, ჯგუფური ძალადობისა და მასში მონაწილეობის ბრალდებით დააკავეს.

შსს აცხადებს, რომ მათ 12 აპრილს გუმათჰესის დასახლებაში მიმდინარე საპროტესტო აქციაზე ჯგუფურად იძალადეს და ფიზიკური დაზიანებები მიაყენეს აქციაზე მყოფ სამ პირს, ასევე, დააზიანეს ერთ-ერთი დაზარალებულის კუთვნილი ავტომანქანა.