ექსპრეზიდენტი მიხეილ სააკაშვილი ციხიდან მორიგ წერილს აქვეყნებს, სადაც წერს, რომ აუცილებელია, თუნდაც მხოლოდ 5 წლით უზენაეს სასამართლოში კლანი მაღალკვალიფიციურმა ევროპელმა მოსამართლეებმა ჩაანაცვლონ. სააკაშვილის თქმით, მოსამართლეებმა, მაგალითად, ჰოლანდიიდან, გერმანიიდან, დანიიდან, ესტონეთიდან და უნდა შექმნან დისციპლინარული კოლეგია ქვემდგომი მოსამართლეებისთვის.

"უზენაეს სასამართლოში კლანი თუნდაც მხოლოდ 5 წლით უნდა ჩაანაცვლონ მაღალკვალიფიციურმა ევროპელმა მოსამართლეებმა, მაგალითად — ჰოლანდიიდან, გერმანიიდან, დანიიდან, ესტონეთიდან და მათვე უნდა შექმნან დისციპლინარული კოლეგია ქვემდგომი მოსამართლეებისთვის. უცხოელები დაამკვიდრებენ სასამართლოს ახალ მოსამართლეთა კორპუსისთვის", — წერს სააკაშვილი.

მისივე თქმით, საქართველოში შემოსაღებია ჭეშმარიტი თვითმმართველობა, სადაც არცერთი თეთრი არ დაიხარჯება თითოეული მოქალაქის მიერ კონტროლის გარეშე. სააკაშვილის აზრით, პირველი ინსტანციის მოსამართლეები და ადგილობრივი პოლიციის უფროსები ადგილობრივი მოსახლეობის მიერ უნდა აირჩეს და მათ წინაშე უნდა იყვნენ ანგარიშვალდებულები და მაშინ ისინი საკუთარ ხალხზე ხელს ვეღარ აღმართავენ.

მას აქვს იდეა აქვს, ყველა დონის არჩევნები მთელს მსოფლიოში გაბნეულ ქართველთა შორის ელექტრონულად ჩატარდეს და არჩევნების ადმინისტრირება ევროკავშირის მიერ მოხდეს.

"აუცილებელია შირაქის აეროპორტი და საზღვაო ინფრასტრუქტურა, რომ მივაღწიოთ ამერიკულ და NATO-ს ძალების რამდენიმე ათასიანი კონტიგენტის განთავსებას საქართველოში. საქართველოს დაცვის სურვილი დასავლეთს გაუჩნდება მხოლოდ იმ შემთხვევაში თუ ჩვენ თვითონ ვაჩვენებთ, რომ ვიბრძვით დემოკრატიისთვის და თავისუფლებისთვის", — წერს სააკაშვილი.

უკრაინაში მცხოვრები ექსპრეზიდენტი მიხეილ სააკაშვილი საქართველოში სექტემბრის ბოლოს, საარჩევნოდ დაბრუნდა, რომლის შემდეგაც ის პირველ ოქტომბერს დააკავეს. დაკავების პირველივე დღიდან მან შიმშილობა გამოაცხადა. შიმშილობა გაგრძელდა გლდანის მე-18 დაწესებულებაშიც, სადაც მისი განცხადებით, მოტყუებითა და იძულებით გადაიყვანეს. სააკაშვილმა შიმშილობა მას შემდეგ შეწყვიტა, რაც იუსტიციის სამინისტრომ გორის სამხედრო ჰოსპიტალში გადაყვანა შესთავაზა. ექსპრეზიდენტი რუსთავის პენიტენციური დაწესებულებიდან გორის სამხედრო კლინიკაში 19 ნოემბერს, 50-დღიანი შიმშილობის შემდეგ გადაიყვანეს.