აშშ-ს ელჩი საქართველოში კელი დეგნანი საოკუპაციო ხაზთან საქართველოს მოქალაქეების დაკავებაზე აცხადებს, რომ ეს მიუღებელია და უნდა შეჩერდეს. ელჩი, ასევე, რუსეთს 2008 წელს აღებული ვალდებულებების შესრულებას ახსენებს.

"ძალიან გვაშფოთებს, როდესაც ვიგებთ, რომ საქართველოს მოქალაქეებს აკავებენ ან ავიწროებენ ადმინისტრაციული სასაზღვრო ზოლის გასწვრივ. ეს არის მიუღებელი და იმგვარი ზეწოლა, რომელიც მარტივად უნდა შეწყდეს და შეწყდება, როდესაც რუსეთი დაემორჩილება ნაკისრ ვალდებულებას 2008 წლის შეთანხმების მიხედვით ჯარის გაყვანასთან დაკავშირებით. ეს არის მარტივი ნაბიჯი, რომელიც რუსეთმა უნდა გადადგას და ყველას სურს ეს დაინახოს", — განაცხადა დეგანმა.

საოკუპაციო ხაზთან საქართველოს მოქალაქეებს უკანონოდ ხშირად აკავებენ. სოკუპაციო რეჟიმის წარმომადგენლებმა საქართველოს კიდევ ერთი მოქალაქე 12 დეკემბერს გაიტაცეს. სახელმწიფო უსაფრთხოების სამსახურის განცხადებით, ის გორის მუნიციპალიტეტის სოფელ ზემო ნიქოზის მიმდებარედ, უკანონოდ დააკავეს.

სუს-ის განცხადებით, ოკუპირებულ რეგიონებსა და საოკუპაციო ხაზის გასწვრივ რუსეთის საოკუპაციო ძალების მიერ განხორციელებული დესტრუქციული ქმედებები, რაც მათ შორის გამოიხატება უკანონო დაკავებებში, აზიანებს რეგიონში არსებულ უსაფრთხოების გარემოს და მნიშვნელოვნად ართულებს ადგილობრივი მოსახლეობის ყოველდღიურობას.