მიხეილ სააკაშვილის შვილმა, ედუარდ სააკაშვილმა ექსპრეზიდენტი გორის სამხედრო ჰოსპიტალში მოინახულა. შეხვედრის შემდეგ მან განაცხადა, რომ ექსპრეზიდენტი თავს სუსტად გრძნობს, თუმცა ფსიქოლოგიურად ფორმაშია.

"ეს იყო მეორე შეხვედრა ზოგადად, თუმცა გადაყვანის და ამ მთელი ამბების შემდეგ პირველი. სისუსტე შეიმჩნევა, თუმცა არის ფსიქოლოგიურად ფორმაში და აქვს სურვილი დაესწროს პროცესს და მეც დიდი იმედი მაქვს, ამის შესაძლებლობა ექნება. სხვა, რა ვიცი, პოლიტიკაზე დიდად არ გვისაუბრია. უბრალოდ მოვინახულეთ, მეც, გიულიმაც. სასიამოვნო შეხვედრა იყო და იმედიანად ვუყურებ ახლო მომავალს, ზოგადად", — განაცხადა მან.

მიხეილ სააკაშვილი გორის სამხედრო ჰოსპიტალში მე-12 დღეა იმყოფება. ის გლდანის მე-18 სამედიცინო დაწესებულებიდან მას შემდეგ გადაიყვანეს, რაც იუსტიციის სამინისტრომ მას გორის სამხედრო ჰოსპიტალში გადაყვანა შესთავაზა, რასაც ექსპრეზიდენტი დათანხმდა და შიმშილობა შეწყვიტა. სააკაშვილი 50 დღე შიმშილობდა.