პრემიერმინისტრის, ირაკლი ღარიბაშვილის განცხადებით, აშშ-ს პრეზიდენტის, ჯო ბაიდენის ორგანიზებულ დემოკრატიის სამიტს მათი გადაწყვეტილებით, პრეზიდენტი, სალომე ზურაბიშვილი დაესწრება.

"რამდენიმე კვირის წინ გავავრცელეთ ინფორმაცია, რომ საქართველომ მიიღო მოსაწვევი პრეზიდენტ ბაიდენისგან დემოკრატიის სამიტზე. ახლა უკვე ჩვენ მივიღეთ ოფიციალური მოსაწვევიც ქალბატონი პრეზიდენტის სახელზე და ჩვენი გადაწყვეტილებით, ქალბატონი პრეზიდენტი მიიღებს მონაწილეობას ჩვენი ქვეყნის სახელით აღნიშნულ დემოკრატიის სამიტზე, რომელიც გაიმართება 10 დეკემბერს", — განაცხადა მან.

მისივე თქმით, საქართველო 1-2 დეკემბერს დაგეგმილ NATO-ს მინისტერიალზეც მიიწვეს, რომელსაც საგარეო საქმეთა მინისტრი, დავით ზალკალიანი დაესწრება. გარდა ამისა, ღარიბაშვილის განცხადებით, ასოცირებული ტრიოს პრემიერმინისტრები მოსამზადებელი ვიზიტით ერთმანეთს აღმოსავლეთ პარტნიორობის სამიტამდე შეხვდებიან.

"ვემზადებით ასოცირებული ტრიოს პრემიერების სამიტისთვის, რომელიც სავარაუდოდ გაიმართება 30 ნოემბერს და 1-ლ დეკემბერს ბრიუსელში, სავარაუდოდ, ჩვენ გავქვს წინასწარი თანხმობა ამის თაობაზე, ეს იქნება მოსამზადებელი ვიზიტი აღმოსავლეთ პარტნიორობის სამიტის, რომელიც გაიმართება უკვე 15 დეკემბერს", — აღნიშნა მან.

აღსანიშნავია, რომ 21 ნოემბერს გამოცემა Politico-მ ექსპრეზიდენტის, მიხეილ სააკაშვილის წერილი გაავრცელა. ის იქ ბაიდენს მიმართავს და საქართველოში მიმდინარე მოვლენებთან დაკავშირებით პოზიციის ღიად დაფიქსირებას სთხოვს. წერილში სააკაშვილი საუბრობს დემოკრატიის საფრთხეებზე, რომელიც საქართველოში, მისი მტკიცებით, ქართულმა ოცნებამ შექმნა.