ექსპრეზიდენტ მიხეილ სააკაშვილის პირადი ექიმის, ნიკოლოზ ყიფშიძის თქმით, ის გადაწყვეტილების მიმღები პირი რომ იყოს, სააკაშვილს ციხეებს გარეთ, თავისუფლად მკურნალობის შესაძლებლობას მისცემდა. ამაში ყიფშიძე გულისხმობს იმას, რომ პაციენტმა თვითონ უნდა გადაწყვიტის სად, როგორ და ვისთან იმკურნალებს.

"მე შემომაქვს ასეთი კითხვა, იქნება გავათავისუფლოთ ეს ადამიანი, იმკურნალოს ნორმალაურად. ჩემი რეკომენდაციაა, რომ ამ ადამიანს თავისუფლად მკურნალობის უფლება მივცეთ. აქ იქნება ხო ეს კაცი, არსად არ მიდის", — ამბობს ექიმი.

ყიფშიძის თქმით, რომ მარტო წამლების მიღება, მკურნალობას არ ნიშნავს. ექიმი, ასევე, აღნიშნავს, რომ ეს განცხადება მას სააკაშვილთან არ შეუთანხმებია.

"ალბათ შემდეგ დღეებში შევხედავთ როგორ იქნება საქმე. დღესდღეობით, ვერავითარ პროგნოზს მე ვერ მოგცემთ ნევროლოგიასთან დაკავშირებით. რაც შეეხება კვებას, უკვე დაიწყო კვება, ნორმალურად წავიდა ეს პროცესი. არავინ იცის რა მოხდება, როგორ გაგრძელდება ეს ყველაფერი. განსაკუთრებული ყურადღების ქვეშ უნდა იყოს ჩვენი პრეზიდენტი", — აღნიშნა მან.

ყიფშიძის თქმით, პრეზიდენტი დიდ მადლობას უხდის საავადმყოფოს და ექიმებს.

"ძალიან მოეწონა სტაფი, მაგრამ ჩემი აზრით, მკურნალობა ასეთ პირობებში, ეს იქნება გორის საავადმყოფო, ციხის საავადმყოფო და ასე შემდეგ შეუძლებელია ასეთ პირობებში. მისი რეაბილიტაცია საკმაოდ ხანგრძლივი უნდა იყოს, ამიტომ ჩემი გულწრფელი აზრია როგორც ექიმის, შეიძლება კოლეგები არ დამეთანხმონ, შეიძლება მოსახლეობა არ დამეთანხმოს, მაგრამ მე რომ შემეძლოს გადაწყვეტილების მიღება, ასეთ ადამიანს მივცემდი უფლებას მკურნალობის ამ ციხეების გარეთ, თავისუფლებად მკურნალობის შესაძლებლობას. თავისუფლად მკურნალობის შესაძლებლობა ნიშნავს მკურნალობას არა ციხეებში, არა ბადრაგის თანხლებით, არის რაღაც გზები, ალბათ იურისტებმა უფრო იციან ამის შესახებ", — განაცხადა სააკაშვილის პირადმა ექიმმა.

მან, ასევე აღნიშნა, რომ გორის ჰოსპიტალში ყოფილ პრეზიდენტს დილით გარკვეული პრობლემები ჰქონდა ბადრაგთან დაკავშირებით, როცა მას ფანჯრის გაღების უფლება არ მისცა, თუმცა აღნიშნავს, რომ ეს პრობლემა უკვე მოგვარდა.

გუშინ, 19 ნოემბერს კი იუსტიციის სამინისტრომ მიხეილ სააკაშვილს გორის სამხედრო ჰოსპიტალში გადაყვანა შესთავაზა, რასაც ექსპრეზიდენტი დათანხმდა და განაცხადა, რომ განთავსებისთანავე შიმშილობას შეწყვეტს.

სააკაშვილი 50 დღე შიმშილობდა. ადვოკატები, სამედიცინო სფეროს წარმომადგენლები, ომბუდსმენი, მხარდამჭერები, საერთაშორისო პარტნიორები მთავრობას მოუწოდებდნენ, ექსპრეზიდენტი სამოქალაქო კლინიკაში გადაეყვანა, თუმცა ამის ნაცვლად ის ძალის გამოყენებით გლდანის ციხის სამკურნალო დაწესებულებაში გადაიყვანეს. ამის გამო, პროტესტის ნიშნად, სააკაშვილმა სამედიცინო მომსახურებაზე უარი თქვა და მისი მდგომარეობა დამძიმდა, რის შემდეგაც მოწოდებები გადაყვანაზე გახშირდა, თუმცა ხელისუფლება უარზე იყო.

სტრასბურგის სასამართლოს გადაწყვეტილების შემდეგ, რომელმაც სააკაშვილს შიმშილობის შეწყვეტისკენ მოუწოდა, ხოლო სახელმწიფოს მის ჯანმრთელობაზე ინფორმაციის მიწოდებისა და შიმშილობის მერე ადეკვატური მკურნალობა დაავალა, ექსპრეზიდენტმა განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.