ნაციონალური მოძრაობის თავმჯდომარე, ნიკა მელია ხელისუფლებას "სადისტურ რეჟიმს" უწოდებს და აცხადებს, რომ მისი მიზანი მიხეილ სააკაშვილის მოკვლაა. ეს განცხადება მელიამ სპეციალურ ბრიფინგზე გააკეთა, რომელიც პარტიაში ექსპრეზიდენტის გონების დაკარგვის შემდეგ ჩაინიშნა.

"სადისტური რეჟიმი მოქმედებაშია, სადისტური რეჟიმი არ ავლენს ელემეტარულ ადამიანურ ნიშნებსაც კი და ცდილობს სისრულეში მოიყვანოს ამ ქვეყნისთვის დამღუპველი გეგმა; უარს არ ამბობს საკუთარ მანიაკალურ სურვილზე, არც მეტი და არც ნაკლები, დატყვევებული ადამიანი მოკლას. მოკლას არა საავადმყოფოში, არა ციხეში, არამედ იქ, სადაც მოისურვა ბიძინა ივანიშვილმა. ის არც ციხეა და არც საავადმყოფოა. ის არის უბრალოდ რაღაცა შენობა, სადაც დატყვევებული ყავს ადამიანი", — განაცხადა მელიამ.

გარდა ამისა, ნიკა მელიამ გააუქმა ხვალ დაგეგმილი სამი საპროტესტო მსვლელობა და აქცია, 15:00 საათზე რესპუბლიკის მოედანზე დააანონსა.

დღეს ექსპრეზიდენტის ადვოკატმა, ბექა ბასილაიამ მე-18 დაწესებულებიდან გამოსვლის შემდეგ განაცხადა, რომ სააკაშვილი ოთახიდან გასვლისას "მოსხლეტით წაიქცა და გადააწვინეს საწოლზე", ამასთან მან თქვა, რომ ხელით გაუხსნეს თვალები. ამის შემდეგ პენიტენციურმა გაავრცელა განცხადება და თქვა, რომ სააკაშვილის მდგომარეობა სტაბილურია და "ცოტა ხანში ექიმი რეანიმატოლოგი გააკეთებს კომენტარს მედიისთვის". რეანიმატოლოგმა კი თქვა, რომ ექსპრეზიდენტი რეანიმაციაშია. მისივე თქმით, პაციენტმა მცირე ხნით გონება დაკარგა. ასევე, ჰქონდა მაღალი წნევა და ახლა "აბსოლუტურად სტაბილურ" მდგომარეობაშია.