იუსტიციის სამინისტროში სააკაშვილის ჯანმრთელობის მდგომარეობაზე პირველი ბრიფინგი გაიმართა, რომელზეც პენიტენციურ სამსახურის წარმომადგენელმა განაცხადა, რომ ექსპრეზიდენტის ამჟამინდელი ჯანმრთელობის მდგომარეობა სტაბილურია და მას საფრთხე არ ემუქრება.

"ძირითადი სასიცოხლო მაჩვენებლები, როგორიც არის არტერიული წნევა, პულსი, სუნთქვა, სატურაცია ნორმის ფარგლებშია. ასევე, ნორმის ფარგლებშია ძირითადი ლაბორატორიული მაჩვენებლები. მას ინტენსიურად უტარდება, ლაბორატორიული და სხვა დიაგნოსტიკური გამოკვლევები, შესაბამისად, ის უზრუნველყოფილია შესაბამისი სამედიცინო მომსახურებით.

დღეის მდგომარეობით მისი ჯანმრთელობის მდგომარეობა მუდმივი კონტროლის ქვეშ არის და საფრთხე არ ემუქრება", — განაცხადა მან.

ჟურნალისტმა მას ჰკითხა, როგოია ექსპრეზიდენტის აძირითადი მარკერები, მაგალითად, ჰემოგლობინის შემცველობა ან მჟავა-ტუტოვანი ბალანსი, ასევე, არსებობდა, თუ არა ჰიპოგლიკემიური კომის განვითარების საფრთხე. პასუხად მან განაცხადა, რომ უფრო მეტად ვერ დააკონკრეტებს სააკაშვილის ანალიზების პასუხებს, რადგან ეს პერსონალური მონაცემებია. მანვე განაცხადა, რომ კონსილიუმი არ შეჩერებულა და ბრიფინგი ისე დატოვა, რომ ჟურნალისტების სხვა კითხვებს არ უპასუხა.

დღეს, 16 ნოემბერს იუსტიციის მინისტრმა, რატი ბრეგაძემ განაცხადა, რომ სააკაშვილის ჯანმრთელობის მდგომარეობაზე მუდმივად ვრცელდება დეზინფორმაცია, რის აღმოსაფხვრელადაც ყოველდღე ექიმების ჯგუფი განმარტებებს გააკეთებს. მის თქმით, სააკაშვილზე ისაუბრებდნენ ის ექიმები, რომლებიც უშუალოდ მკურნალობენ და აქვთ ყველაზე მეტი ინფორმაცია პატიმრის ჯანმრთელობაზე. მანვე განაცხადა, რომ გლდანის ციხეში კონსილიუმს მაშინ შეუშვებენ, როცა ამის საჭიროება დადგება და რეკომენდაციები ენდომებათ.

კონსილიუმის წევრებს ექსპრეზიდენტი რამდენიმე დღეა არ უნახავთ. ვრცელდებოდა ინფორმაცია, თითოს მიხეილ სააკაშვილს მათთან შეხვედრა არ სურს, რაც მისმა ადვოკატებმა უარყვეს. 14 ნოემბერს შოთა თუთბერიძემ განაცხადა, რომ სააკაშვილის პოზიცია კონსილიუმს აცნობეს, ამიტომ ექიმებს იმავე დღეს ელოდებოდნენ. საღამოს კი ცნობილი გახდა, რომ ორსაათიანი ლოდინის შემდეგ კონსილიუმი ციხეში არ შეუშვეს იმ მოტივით, რომ არასამუშაო საათები იყო.

გარდა ამისა, ექსპრეზიდენტი და მისი ადვოკატები მოითხოვენ, სახალხო დამცველის ეგიდით შეიქმნას ახალი კონსილიუმი პარიტეტული მოტივებით, რომელშიც 8 ექიმი სააკაშვილის, 8 კი სახელმწიფოს სურვილით შევა. ომუბდსმენმა განაცხადა, რომ მისი აპარატი ვერ ჩაანაცვლებს სახელმწიფოს პასუხისმგებლობას პატიმრის ჯანმრთელობაზე ზრუნვის კონტექსტში და ვერ განსაზღვრავს პაციენტის მკურნალობის ტაქტიკას. ლომჯარია მიიჩნევს, რომ არსებულმა კონსილიუმმა არათუ უნდა შეწყვიტოს ფუნქციონირება, უფრო ინტენსიურად უნდა განაგრძოს.