ექსპრეზიდენტის, მიხეილ სააკაშვილის ადვოკატის, ბექა ბასიალაის განცხადებით, დღეს ვხედავთ ხელისუფლებას, რომელსაც სააკაშვილის საზოგადოების წინაშე გამოჩენაზე "აკანკალებს". მისი თქმით, სასამართლომ დღეს დაადასტურა, რომ საქართველოში მართლმსაჯულება არ არსებობს.

"სასამართლომ დღეს თქვა, რომ არ აქვს რა მიზეზით, მთავარია სააკაშვილი არ იყოს დარბაზში, თქვა, რომ სუს-ის მონაჭორსა და ცხვარიაშვილის გამონაგონზე დაყრდნობით ის პროცესებს წარმართავს სააკაშვილის მონაწილეობის გარეშე. მე მინდა, მივმართო ქართულ საზოგადოებას, რომ მთელი 9 წლის მანძილზე გვკვებავდნენ მითით, რომ სააკაშვილს აგებინებნდნენ პასუხს, თუ როგორი საშიში დამნაშავე იყო და დღეს ვხედავთ შეშინებულ ხელისუფლებას, რომელსაც არ შეუძლია მიხეილ სააკაშვილის სასამართლოში გასამართლება, ვხედავთ ხელისუფლებას, რომელსაც აკანკალებს მიხეილ სააკაშვილის საზოგადოების წინაშე გამოჩენაზე", — აცხადებს ის.

მისივე თქმით, ხელისუფლება ელოდება მდგომარეობას, როცა სააკაშვილი ვეღარ შეძლებს გადაადგილებასა და საუბარს, რათა მერე დათანხმდნენ მის სასამართლო სხდომებზე დასწრებას, თუმცა აღნიშნონ, რომ ჯანმრთელობის გაუარესების გამო, სააკაშვილს თავად არ შეუძლია მისვლა.

"ისინი ელოდებიან მდგომარეობას, როცა ქუჩის პროტესტი ჩაცხრება, როცა ხალხი გატყდება, მაგრამ ეს არ მოხდება, რადგან ყველა ხედავს, როგორ უსამართლობას აქვს ადგილი. მათ აქვთ უდიდესი შიში, თუნდაც ტელეეკრანიდან ციხის საკნიდან გამოჩნდეს მიხეილ სააკაშვილი", — აცხადებს ის.

დღეს სააკაშვილის უფლებადამცველებმა სასამართლო პროცესი დატოვეს. ადვოკატმა ბექა ბასილაიამ განაცხადა, რომ მისთვის გაუგებარია მოსამართლის გაჯიუტება იმაზე, რომ სხდომაზე კიდევ ორი ადვოკატი, ნიკა გვარამია და დიმიტრი საძაგლიშვილი შევიდეს. მომდევნო სასამართლო სხდომა 29 ნოემბერს, 11 საათზე ჩაინიშნა.

სააკაშვილი, მისი სურვილის მიუხედავად, სასამართლო პროცესზე დასასწრებად არ მიიყვანეს. პენიტენციური სამსახურის მტკიცებით, ამის მიზეზი სასამართლოში ესკორტირებისას შესაძლო "დესტრუქციული ხასიათის ქმედებაა". პროკურატურამ შუამდგომლობა დააყენა, რომ პენიტენციური დაწესებულების გადაწყვეტილების გამო, სხდომა ციხეში ჩატარდეს ან სააკაშვილი დისტანციურად ჩართონ.

სააკაშვილის ადვოკატმა, ბექა ბასილაიამ დღევანდელ პროცესზე მოსამართლეები აცილება მოითხოვა. მისი თქმით, მართლმსაჯულების აღსრულებისთვის სააკაშვილის სხდომაზე ყოფნა საჭირო იყო, თუმცა მოსამართლეებმა ეს არ გააკეთეს და "წინასწარ დაგეგმილ სცენარს" მიჰყვებოდნენ.

მიხეილ სააკაშვილს გამოძიება ედავება ძალადობით ან იარაღის გამოყენებით, დაზარალებულის პირადი ღირსების შეურაცხყოფით სამსახურებრივი უფლებამოსილების გადამეტებას, რამაც ფიზიკური ან იურიდიული პირის უფლების, საზოგადოების ან სახელმწიფოს კანონიერი ინტერესის არსებითი დარღვევა გამოიწვია. კერძოდ, ბრალდება ეხება 7 ნოემბრის აქციის დარბევას, ტელეკომპანია იმედში შეჭრასა და ბადრი პატარკაციშვილის ქონების დანაშაულებრივად ხელში ჩაგდებას.