პარლამენტის შენობის უკანა შესასვლელთან რკინის ჯებირი კვლავ აღმართეს.

აღსანიშნავია, რომ დღეს 8 საათზე თავისუფლების მოედანზე ექსპრეზიდენტ მიხეილ სააკაშვილის მხარდამჭერი აქცია გაიმართება. ენმ-ის თავმჯდომარემ, ნიკა მელიამ 6 ნოემბერს რუსთავში გამართულ აქციაზე ხელისუფლებას 24-საათიანი ვადა მისცა, რომ სააკაშვილი სამოქალაქო კლინიკაში გადაეყვანათ. გუშინ კი მელიამ განაცხადა, რომ ულტიმატუმის ვადა ამოიწურა და თავისუფლების მოედანზე აქცია დააანონსა.

რკინის ჯებირი პარლამენტთან პირველად არ დგას. ის თავდაპირველად 2019 წელს აღმართეს, როცა საკანონმდებლო ორგანოსთან აქციები იმართებოდა და მხოლოდ წელიწადნახევრის შემდეგ, 2021 წლის ივნისში მოხსნეს. დაახლოებით 5 თვის შემდეგ კი, რკინის ჯებირები პარლამენტთან დაბრუნდა.