პოლიციელის მკვლელობის საქმეზე დაკავებულ პოლიციელს პროკურატურამ ბრალი წარუდგინა. უწყება ხობის რაიონული სამართველოს ჭალადიდის პოლიციის განყოფილების ინსპექტორ-გამომძიებელს კოლეგის განზრახ მკვლელობას ედავება. მათი თქმით, ბრალდებულმა საშტატო იარაღიდან გამომძიებელს მრავალჯერ ესროლა.

"გამოძიებით დადგინდა, რომ 2021 წლის 5 ნოემბერს, ხობის მუნიციპალიტეტის სოფელ ჭალადიდში მდებარე, შსს ხობის რაიონული სამართველოს ჭალადიდის პოლიციის განყოფილების შენობაში, ბრალდებულმა ურთიერთშელაპარაკების ნიადაგზე, მასზე განპიროვნებული სამსახურებრივი საშტატო ცეცხლსასროლი იარაღიდან მრავალჯერადი გასროლით, ამავე განყოფილების უბნის უფროს ინსპექტორ-გამომძიებელს ჭრილობები მიაყენა, რომელიც მიღებული დაზიანებების შედეგად ადგილზე გარდაიცვალა", — აცხადებენ უწყებაში.

შემთხვევა 5 ნოემბერს მოხდა. პოლიციელს ბრალდება საქართველოს სისხლის სამართლის კოდექსის 108-ე მუხლით წარედგინა, რაც სასჯელის სახედ და ზომად 7-დან 15 წლამდე თავისუფლების აღკვეთას ითვალისწინებს. პროკურატურა ბრალდებულისთვის აღკვეთის ღონისძიების სახით პატიმრობის შეფარდების შუამდგომლობით, სასამართლოს კანონით დადგენილ ვადაში მიმართავს.